Senat yalpi majlisida “O‘zbekiston Respublikasining ayrim qonun hujjatlariga jamoatchilik nazoratini kuchaytirishga qaratilgan o‘zgartish va qo‘shimchalar kiritish to‘g‘risida”gi qonun muhokama etildi.
Qonun bilan “Davlat tasarrufidan chiqarish va xususiylashtirish to‘g‘risida”gi, “Oziq-ovqat mahsulotlarining sifati va xavfsizligi to‘g‘risida”gi, “O‘simlik dunyosini muhofaza qilish va undan foydalanish to‘g‘risida”gi, “Hayvonot dunyosini muhofaza qilish va undan foydalanish to‘g‘risida”gi, “O‘rmon to‘g‘risida”gi, “Radiatsiyaviy xavfsizlik to‘g‘risida”gi, “Psixiatriya yordami to‘g‘risida”gi qonunlariga tuzatishlar kiritish aks ettirilgan.
Bu o‘zgartishlar “Jamoatchilik nazorati to‘g‘risida”gi qonunning 3-moddasiga muvofiq ishlab chiqilganligi asoslantirilgan.
— “Jamoatchilik nazorati to‘g‘risida”gi qonun jamoatchilik nazoratini tartibga solishga qaratilgan asosiy qonun bo‘lib, undagi normalar amaliyotga to‘g‘ridan-to‘g‘ri tatbiq etiladi, — dedi Senat a’zosi Shuhrat Chulliyev. — Shunga ko‘ra, o‘rinli savol tug‘iladi: aks ettirilgan normani boshqa qonunlarda ham qayta-qayta takrorlash qanchalik maqsadga muvofiq? O‘z o‘rnida, qonun ijodkorligiga asos bo‘lgan “Normativ-huquqiy hujjatlar to‘g‘risida”gi qonunning 24-moddasida “normativ-huquqiy hujjatda, qoida tariqasida, xuddi shunday yuridik kuchga ega bo‘lgan normativ-huquqiy hujjatlarning huquqiy normalari qayta aynan takrorlanmaydi”, degan talab ta’kidlangan.
Qolaversa, jamoatchilik nazoratini ta’minlash bo‘yicha normalarni muhokama qilinayotgan qonun bilan faqat yuqorida qayd etilgan yettita qonunga kiritish bilan cheklanilgan. Vaholanki, qonunni tayyorlashda keltirilgan asoslarga binoan jamoatchilik nazoratini ta’minlash bo‘yicha normalarni mamlakatning aksariyat qonunlarida aks ettirish mumkin.
Qonun bilan Budjet kodeksiga kiritilayotgan o‘zgartishlar uni amalga amalga oshirish mexanizmini lozim darajada ochib bermagani va boshqa kamchiliklarga e’tibor qaratildi. Shu bois ma’ruzachi qonunni rad etishni so‘radi.
Qonun senatorlar tomonidan rad etildi.
Izoh (0)