Сенат ялпи мажлисида «Ўзбекистон Республикасининг айрим қонун ҳужжатларига жамоатчилик назоратини кучайтиришга қаратилган ўзгартиш ва қўшимчалар киритиш тўғрисида»ги қонун муҳокама этилди.
Қонун билан «Давлат тасарруфидан чиқариш ва хусусийлаштириш тўғрисида»ги, «Озиқ-овқат маҳсулотларининг сифати ва хавфсизлиги тўғрисида»ги, «Ўсимлик дунёсини муҳофаза қилиш ва ундан фойдаланиш тўғрисида»ги, «Ҳайвонот дунёсини муҳофаза қилиш ва ундан фойдаланиш тўғрисида»ги, «Ўрмон тўғрисида»ги, «Радиациявий хавфсизлик тўғрисида»ги, «Психиатрия ёрдами тўғрисида»ги қонунларига тузатишлар киритиш акс эттирилган.
Бу ўзгартишлар «Жамоатчилик назорати тўғрисида»ги қонуннинг 3-моддасига мувофиқ ишлаб чиқилганлиги асослантирилган.
— «Жамоатчилик назорати тўғрисида»ги қонун жамоатчилик назоратини тартибга солишга қаратилган асосий қонун бўлиб, ундаги нормалар амалиётга тўғридан-тўғри татбиқ этилади, — деди Сенат аъзоси Шуҳрат Чуллиев. — Шунга кўра, ўринли савол туғилади: акс эттирилган нормани бошқа қонунларда ҳам қайта-қайта такрорлаш қанчалик мақсадга мувофиқ? Ўз ўрнида, қонун ижодкорлигига асос бўлган «Normaтив-ҳуқуқий ҳужжатлар тўғрисида»ги қонуннинг 24-моддасида «норматив-ҳуқуқий ҳужжатда, қоида тариқасида, худди шундай юридик кучга эга бўлган норматив-ҳуқуқий ҳужжатларнинг ҳуқуқий нормалари қайта айнан такрорланмайди», деган талаб таъкидланган.
Қолаверса, жамоатчилик назоратини таъминлаш бўйича нормаларни муҳокама қилинаётган қонун билан фақат юқорида қайд этилган еттита қонунга киритиш билан чекланилган. Ваҳоланки, қонунни тайёрлашда келтирилган асосларга биноан жамоатчилик назоратини таъминлаш бўйича нормаларни мамлакатнинг аксарият қонунларида акс эттириш мумкин.
Қонун билан Бюджет кодексига киритилаётган ўзгартишлар уни амалга амалга ошириш механизмини лозим даражада очиб бермагани ва бошқа камчиликларга эътибор қаратилди. Шу боис маърузачи қонунни рад этишни сўради.
Қонун сенаторлар томонидан рад этилди.
Изоҳ (0)