Navoiy viloyatida jazoni ijro etish muassasalarida jazo muddatini o‘tab chiqqan 50 nafar fuqaro jamiyatga moslashtirish bo‘yicha nazoratga olindi. Bu haqda Navoiy viloyat IIB matbuot xizmati “Daryo”ga xabar berdi.
Qamoq jazosini o‘tab chiqqan fuqarolarga ishga joylashish, sog‘liqlarini tiklash, turli tadbir va loyihalarda ishtirok etish va boshqa ijtimoiy masalalarda Navoiy viloyat IIB probatsiya bo‘limi tomonidan amaliy yordam ko‘rsatilmoqda. Mazkur jarayonda hokimliklar, xotin-qizlar qo‘mitalari, yoshlar ittifoqi, sog‘liqni saqlash boshqarmasi va bandlikka ko‘maklashish markazlari bilan hamkorlik yo‘lga qo‘yildi.
Ayni paytda Navbahor tuman ichki ishlar organlari probatsiya bo‘linmasi va Navbahor tuman hokimligi bilan hamkorlikda jazoni o‘tab chiqqan Shoira Hafizovaga o‘z arizasiga asosan Navbahor tumanidan uy-joy ajratildi.
“Men oilaliman 3 nafar farzandim bor. 2018-yilning aprel oyida jazoni o‘tab chiqqanimdan keyin odatiy hayotga ko‘nikish oson kechmadi. Shunday vaziyatda ichki ishlar xodimlari yordami bilan diplomimga qarab Navbahor tuman tibbiyot birlashmasiga hamshira bo‘lib ishga kirdim. Endi esa mustaqil yashash uchun o‘z uyim ham bor”, — deydi Shoira Hafizova.
Ma’lumot o‘rnida aytib o‘tish joiz, O‘zbekiston Prezidentining 2018-yil 7-noyabrdagi “Jinoyat ijroiya qonunchiligini tubdan takomillashtirish chora-tadbirlari to‘g‘risida”gi qarori asosida barcha hududlarda bo‘lgani kabi Navoiy viloyati ichki ishlar boshqarmasida ham probatsiya bo‘limi tashkil etildi.
“Viloyat IIB boshlig‘ining ichki buyrug‘i asosida probatsiya bo‘limi va apparati hamda shahar, tuman ichki ishlar organlari probatsiya guruhi xodimlari lavozimlarga tayinlandi, — deydi viloyat IIB matbuot xizmati rahbari O‘ktam Usmonov. — Probatsiya xizmati xodimlari zimmasiga mahkumlarning xulq atvori ustidan ta’sirchan nazoratni amalga oshirish, jazo muassasasidan ozod etilganlarni ijtimoiy moslashtirish, ishga joylashtirish va kasbiy tayyorlov vazifasi kiradi”.
Izoh (0)