Навоий вилоятида жазони ижро этиш муассасаларида жазо муддатини ўтаб чиққан 50 нафар фуқаро жамиятга мослаштириш бўйича назоратга олинди. Бу ҳақда Навоий вилоят ИИБ матбуот хизмати «Дарё»га хабар берди.
Қамоқ жазосини ўтаб чиққан фуқароларга ишга жойлашиш, соғлиқларини тиклаш, турли тадбир ва лойиҳаларда иштирок этиш ва бошқа ижтимоий масалаларда Навоий вилоят ИИБ пробация бўлими томонидан амалий ёрдам кўрсатилмоқда. Мазкур жараёнда ҳокимликлар, хотин-қизлар қўмиталари, ёшлар иттифоқи, соғлиқни сақлаш бошқармаси ва бандликка кўмаклашиш марказлари билан ҳамкорлик йўлга қўйилди.
Айни пайтда Навбаҳор туман ички ишлар органлари пробация бўлинмаси ва Навбаҳор туман ҳокимлиги билан ҳамкорликда жазони ўтаб чиққан Шоира Ҳафизовага ўз аризасига асосан Навбаҳор туманидан уй-жой ажратилди.
«Мен оилалиман 3 нафар фарзандим бор. 2018 йилнинг апрель ойида жазони ўтаб чиққанимдан кейин одатий ҳаётга кўникиш осон кечмади. Шундай вазиятда ички ишлар ходимлари ёрдами билан дипломимга қараб Навбаҳор туман тиббиёт бирлашмасига ҳамшира бўлиб ишга кирдим. Энди эса мустақил яшаш учун ўз уйим ҳам бор», — дейди Шоира Ҳафизова.
Маълумот ўрнида айтиб ўтиш жоиз, Ўзбекистон Президентининг 2018 йил 7 ноябрдаги «Жиноят ижроия қонунчилигини тубдан такомиллаштириш чора-тадбирлари тўғрисида»ги қарори асосида барча ҳудудларда бўлгани каби Навоий вилояти ички ишлар бошқармасида ҳам пробация бўлими ташкил этилди.
«Вилоят ИИБ бошлиғининг ички буйруғи асосида пробация бўлими ва аппарати ҳамда шаҳар, туман ички ишлар органлари пробация гуруҳи ходимлари лавозимларга тайинланди, — дейди вилоят ИИБ матбуот хизмати раҳбари Ўктам Усмонов. — Пробация хизмати ходимлари зиммасига маҳкумларнинг хулқ атвори устидан таъсирчан назоратни амалга ошириш, жазо муассасасидан озод этилганларни ижтимоий мослаштириш, ишга жойлаштириш ва касбий тайёрлов вазифаси киради».
Изоҳ (0)