Фарғона вилоятининг Қўштепа туманида туғилган Гулнора Топволдиева (исм-шарифлар ўзгартирилган) бебош қиз бўлиб улғайди, ўйин-кулги ҳамда кўнгилхушликларни афзал билди. Шунинг учун кейинчалик ота-она уйидан чиқиб кетди. Бу ҳақда «Инсон ва қонун» ҳикоя қилмоқда.
Ана шундай кунларнинг бирида, Тошлоқ туманида яшовчи Баҳромжон исмли йигит билан танишиб қолди. Уларнинг муносабатлари ишқий саргузаштга айланиб, 2017 йилнинг 23- ноябрида Г.Топволдиева ўғил фарзанд кўрди. Табиийки, тайинли уй-жойи бўлмагани боис, боласини боқиш ва тарбиялашга жуда қийналди.
Таниш-билишларидан сўраб-суриштириб, ўғлини Қувасой шаҳрида истиқомат қилувчи Азима Темированинг тарбиясига топширди. Бунинг эвазига Азима опага кунига 15.000 сўмдан ҳақ тўлайдиган ва чақалоқнинг озиқ-овқатларини етказиб бериб турадиган бўлди. Кўнглида эса Жавлонбекни сотиб юборишни режалаштирди.
Бунинг учун Фарғона шаҳрида яшовчи таниши Маъмура Кавлоновадан маслаҳат сўради.
— Бунақа танишларим йўқ. Аммо суриштириб, жавобини айтаман, — деди Маъмура.
Орадан бир неча кун ўтиб, у Гулнорага қўнғироқ қилди.
— Қўқонлик бир дугонамнинг 2 та қизи бору, ўғли йўқ. Болангни ўша сотиб олмоқчи. Розимисан?
Кўпдан буён харидор кутаётган она эса ўйлаб ҳам ўтирмай, дарҳол кўна қолди. Дугоналар 2018 йил 27 февраль куни Фарғона шаҳар марказида учрашди.
— Бу сенга айтган дугонам Вазира, — дея уларни таништирди Маъмура. Аёллар Жавлонбекни 7000 АҚШ долларига олди-сотди қилишга келишишди. Маслаҳат пишгач эса Қувасойга — А.Темированикига йўл олишди. Йўл-йўлакай Гулнора Вазирадан Азимадан бўлган қарзи эвазига 250.000 сўм нақд пул, боласини олиб чиққач, келишилган 7000 АҚШ долларини санаб олди.
Шу пайт фуқаролик кийимида етиб келган шахслар ўзларини Фарғона вилоят ИИБ ва Қувасой шаҳар ИИБ ходимлари сифатида таништириб, уни қўлга олди. Чунки Г.Топволдиеванинг ҳаракатлари ноқонуний эканлигини билган М.Кавлонова ва Ю.Фахриддинова бу хусусда юқоридаги идораларга ариза билан мурожаат қилганди.
Жиноят ишлари бўйича Қувасой шаҳар судининг «Зийнат» маҳалла фуқаролар йиғинида бўлиб ўтган сайёр суд мажлисида Гулнора қилмишидан пушаймонлигини билдириб, қонуний енгиллик ҳамда ўғли қайтариб берилишини сўради. Суд унга қонуний жазо тайинлади ва ўғли Ж.Топволдиев Фарғона шаҳар болалар уйига топширилгани учун уни қайтариб олиш юзасидан фуқаролик ишлари бўйича судга мурожаат қилиш ҳуқуқи тушунтирилди.
Изоҳ (0)