O‘zbekistonning Belgiyadagi elchisi Dilyor Hakimov Yevropa mehmonxonalar, restoranlar va kafelar assotsiatsiyasi (HORTEC) bosh ijrochi direktori Kristian de Barri bilan uchrashdi. Bu haqda TIV matbuot xizmati ma’lum qildi.
Assotsiatsiya Yevropaning 30 davlatida faoliyat yurituvchi 42 ta a’zo-tashkilotdan iborat. Kuzatuvchilar qatorida Gruziya, Turkiya va Yevropaga kirmaydigan qator boshqa davlatlar bor.
Uchrashuv davomida dunyo bo‘yicha turizm 7, Yevropada esa 8 foizga o‘sgani holda O‘zbekistonga turistlar oqimi ikki barobar oshgani qayd etildi. Shu bois mamlakatda sayyohlik xizmatlarini yanada takomillashtirish va rivojlantirishda hamkorlikning yo‘lga qo‘yilishidan ikki tomon ham manfaatdor ekani aytib o‘tildi.
Buning uchun Yevrittifoq davlatlari tomonidan mamlakatga kiritiladigan yirik sarmoyalar zarurligi ta’kidlandi. Suhbat chog‘ida O‘zbekiston oshpazlari assotsiatsiyasi rahbariyati bilan konferens-aloqa o‘tkazilib, unda bo‘lajak aloqalar rejasi ishlab chiqildi.
Muzokaralar yakunida Yevropa tomoni O‘zbekistonni assotsiatsiyaga a’zo bo‘lishga chaqirdi. O‘z navbatida, HORTEC mamlakatda o‘tkaziladigan FoodWeek & Horeca Uzbekistan 2019 xalqaro oziq-ovqat va qadoqlash mahsulotlari ko‘rgazmasiga taklif etildi.
Izoh (0)