Shu yilning 16-fevral kuni Kattaqo‘rg‘on tumani “Saroyqo‘rg‘on” mahallasiga tarqatiladigan 1 dona maxsus xaltada joylashtirilgan 60 million so‘m pensiya va nafaqa pullari Damas rusumli davlat raqami 01 251WEA bo‘lgan sayyor kassa avtomashinasidan o‘g‘irlangan, deb xabar beradi O‘zA.
Bu haqda AT “Xalq banki” Kattaqo‘rg‘on tumani Payshanba filialida haydovchi bo‘lib ishlovchi fuqaro T.J. Kattaqo‘rg‘on shahar IIBga o‘z arizasida ma’lum qilgan.
Arizada qayd etilishicha bank xodimlari X.Sh., I.A., S.E. hamda Kattaqo‘rg‘on shahar IIB tumanlararo qo‘riqlash bo‘limi xodimi B.G‘.lar sayyor kassa avtomashinasida “Saroyqo‘rg‘on”, “Yangiqo‘rg‘oncha” va “Melixo‘ja” mahallalariga pensiya va nafaqa pullarini tarqatish uchun yo‘lga chiqishgan. Avtomashinada 3 dona maxsus xaltalarga solingan 116 million so‘m pul bo‘lgan. Kattaqo‘rg‘on shahar “Bahoriston” mahallasi A.Navoiy ko‘chasiga kelishgan vaqtda qo‘riqlash bo‘limi xodimi G‘.B. avtomashinadan tushib qolgan, qolganlar ham ovqatlanish uchun shu yerda joylashgan “Lavash” nomli oshxonaga kirishgan. Ovqatlanib bo‘lgach, Kattaqo‘rg‘on tumani “Saroyqo‘rg‘on” mahallasi binosiga kelishgan hamda 1 dona maxsus xaltada joylashtirilgan 60 million so‘m pensiya va nafaqa pullari o‘g‘irlab ketilganligini sezishgan.
Kattaqo‘rg‘on shahar IIB xodimlari tomonidan olib borilgan tezkor tadbirlar natijasida, ushbu o‘g‘irlik jinoyatini Sirdaryo viloyatida yashovchi bir guruh fuqarolar F.S., I.B. va T.O‘. sodir etganligi aniqlangan. Fuqaro F.S va I.B. ushlangan va har biridan 15 million so‘mdan pullar ashyoviy dalil sifatida olingan. F.S. boshqaruvida bo‘lgan Nexia rusumli davlat raqami 20 S980SA bo‘lgan avtomashina jarima maydonchasiga joylashtirilgan. Gumon qilinuvchi T.O‘.ni ushlash choralari ko‘rilmoqda.
Izoh (0)