18-fevralning e’tiborga molik yangiliklari — “Daryo” dayjestida.
O‘zbekiston Respublikasi Davlat geologiya muzeyi direktori Ahmadjon Ahmedshayev 14-fevral kuni Farg‘ona viloyatining Rishton tumanidagi xonadondan topilgan dinozavr qoldiqlari yuzasidan o‘z fikrini bildirdi.
“Rishton tumanidagi suyak qoldiqlarining shundoqqina pol ostidan sof suyak holida topilishi ilmiy asossizdir... Mening fikrimcha, suyak qoldiqlari mushuksimonlar oilasiga taalluqli hayvonga tegishlidir. Yaydoq cho‘l hududi bo‘lganligi uchun bu bundan ikki-uch asr oldin, balki undan ham ko‘proq yillarda yashagan cho‘l mushugi, qamish mushugining suyak qoldiqlari bo‘lishi mumkin”, — dedi u.
***
Akfa universiteti 2019-yilning 1-sentabridan ish boshlaydi. Unda 100 nafar o‘zbekistonlik abituriyent bepul o‘qitiladi.
Universitet Shayhontohur tibbiyot kolleji joylashgan hududda barpo etiladi. Bo‘lg‘usi talabalar amaliy bilimlarni ushbu dargohda olib, amaliyotni Akfa Medline klinikasida o‘taydi.
Loyihaning rekonstruksiya ishlari va texnik ta’minoti uchun 5 million dollardan ziyod sarmoya kiritilgan.
***
O‘zbekiston internet tezligi bo‘yicha reytingda keskin pastlab ketdi.
Mobil internet tezligi bo‘yicha O‘zbekiston 137 davlat ichida 129-o‘rinni egalladi (8,80 Mbit/s). Bu o‘tgan yil so‘nggidagi ko‘rsatkichdan 18 pog‘ona pastroq sanaladi. Simli internet tezligi bo‘yicha mamlakat 177 davlat orasidan 131-pog‘onada qayd etildi (11,31 Mbit/s). Bu ko‘rsatkich bo‘yicha O‘zbekiston naq 23-o‘rin pastga tushib ketdi.
***
O‘zbekistonda dollar va yevroning rasmiy kursi qatorasiga ikkinchi hafta pasaymoqda.
AQSh dollari kursi salkam 3 so‘mga pasayib, 8392 so‘mni tashkil etgan.
Yevro 32 so‘mga pasaygan va 9477 so‘mga teng bo‘lgan.
Rossiya rubli kursi 1,5 so‘m atrofida pasayib, 126 so‘mdan iborat bo‘ldi.
***
Payariqda bemorga o‘lim tashxisini qo‘ygan shifokor kaltaklandi. Uning ikki barmog‘i sindi.
Bemor vafot etganidan so‘ng uning yaqinlari tez tibbiy yordamni chaqirishgan. Tez tibbiy yordam shifokori tekshiruvdan o‘tkazib, unda hayot belgilari yo‘qligi, bemor olamdan o‘tganligini aytib ularga hamdardlik bildirgan. Biroq mast holatda bo‘lgan farzandlari vafot etgan odamga yordam berishni talab qilgan.
Izoh (0)