Samarqand viloyatidagi 330 ta mahallada tashkil etilgan “Jamoatchilik nazorati maskani”da xizmat olib borayotgan ko‘ngilli yoshlar tomonidan yil boshidan buyon 50 dan ortiq jinoyatning oldi olindi, 1000 dan ortiq huquqbuzarlik aniqlandi. Bu haqda O‘zA xabar berdi.
Samarqand shahrida “Xavfsiz shahar” konsepsiyasini amalga oshirish jarayonida ushbu maskanlar faoliyati samaradorligini oshirishga alohida e’tibor qaratilmoqda. Ayni paytda shaharda mavjud 92 ta jamoatchilik nazorati maskanlarining 23 tasida videokuzatuv moslamalari o‘rnatilgan bo‘lib, mahalla hududdagi ob’ektlar kuzatib turadi.
Jumladan, Samarqand shahrining “Nafosat” mahallasida o‘rnatilgan jamoatchilik nazorati maskanidagi kuzatuv kameralari orqali 3 ta ko‘cha, 1 ta restoran, 1 ta avtoturargoh va atrofdagi boshqa ob’ektlarni ko‘rib turish mumkin. O‘z navbatida, jamoatchilik nazorat maskanlari faoliyatini kuzatish maqsadida bino ichiga ham kamera o‘rnatildi. Bu videokuzatuv kameralari viloyat ichki ishlar boshqarmasining situatsion markaziga ulangan va to‘g‘ridan-to‘g‘ri kuzatib boriladi.
Ushbu tizim afzalligi tufayli viloyat hokimligi Samarqand shahrida yana 50 ta namunaviy, videokuzatuv va boshqa texnik vositalari bilan jihozlangan jamoatchilik nazorati maskanlari tashkil etishga qaror qildi.
Izoh (0)