18 февралнинг эътиборга молик янгиликлари — «Дарё» дайжестида.
Ўзбекистон Республикаси Давлат геология музейи директори Аҳмаджон Аҳмедшаев 14 февраль куни Фарғона вилоятининг Риштон туманидаги хонадондан топилган динозавр қолдиқлари юзасидан ўз фикрини билдирди.
«Риштон туманидаги суяк қолдиқларининг шундоққина пол остидан соф суяк ҳолида топилиши илмий асоссиздир... Менинг фикримча, суяк қолдиқлари мушуксимонлар оиласига тааллуқли ҳайвонга тегишлидир. Яйдоқ чўл ҳудуди бўлганлиги учун бу бундан икки-уч аср олдин, балки ундан ҳам кўпроқ йилларда яшаган чўл мушуги, қамиш мушугининг суяк қолдиқлари бўлиши мумкин», — деди у.
***
Akfa университети 2019 йилнинг 1 сентябридан иш бошлайди. Унда 100 нафар ўзбекистонлик абитуриент бепул ўқитилади.
Университет Шайҳонтоҳур тиббиёт коллежи жойлашган ҳудудда барпо этилади. Бўлғуси талабалар амалий билимларни ушбу даргоҳда олиб, амалиётни Akfa Medline клиникасида ўтайди.
Лойиҳанинг реконструкция ишлари ва техник таъминоти учун 5 миллион доллардан зиёд сармоя киритилган.
***
Ўзбекистон интернет тезлиги бўйича рейтингда кескин пастлаб кетди.
Мобил интернет тезлиги бўйича Ўзбекистон 137 давлат ичида 129-ўринни эгаллади (8,80 Мбит/с). Бу ўтган йил сўнггидаги кўрсаткичдан 18 поғона пастроқ саналади. Симли интернет тезлиги бўйича мамлакат 177 давлат орасидан 131-поғонада қайд этилди (11,31 Мбит/с). Бу кўрсаткич бўйича Ўзбекистон нақ 23-ўрин пастга тушиб кетди.
***
Ўзбекистонда доллар ва евронинг расмий курси қаторасига иккинчи ҳафта пасаймоқда.
АҚШ доллари курси салкам 3 сўмга пасайиб, 8392 сўмни ташкил этган.
Евро 32 сўмга пасайган ва 9477 сўмга тенг бўлган.
Россия рубли курси 1,5 сўм атрофида пасайиб, 126 сўмдан иборат бўлди.
***
Паяриқда беморга ўлим ташхисини қўйган шифокор калтакланди. Унинг икки бармоғи синди.
Бемор вафот этганидан сўнг унинг яқинлари тез тиббий ёрдамни чақиришган. Тез тиббий ёрдам шифокори текширувдан ўтказиб, унда ҳаёт белгилари йўқлиги, бемор оламдан ўтганлигини айтиб уларга ҳамдардлик билдирган. Бироқ маст ҳолатда бўлган фарзандлари вафот этган одамга ёрдам беришни талаб қилган.
Изоҳ (0)