Toshkent metrosining Alisher Navoiy bekatida Xalq ta’limi vazirligi, Respublika bolalar kutubxonasi va metropoliten boshqarmasi hamkorligida “Navoiy gulshani” deb nomlangan aksiya o‘tkazildi. Bu haqda O‘zA xabar berdi.
Buyuk shoir tavalludining 578 yilligi munosabati bilan tashkil etilgan aksiya Alisher Navoiy adabiy merosini o‘rganish, uning boy madaniy-ma’rifiy merosini targ‘ib etishga xizmat qildi.
Aksiyada metroning kirish qismida yo‘lovchilarga Alisher Navoiy hayoti, ijodiga oid savollar berildi. Shuningdek, shoir g‘azallaridan namunalar o‘qib berish so‘raldi. G‘olib yo‘lovchilar metropolitendan foydalanish uchun jeton va badiiy kitoblar bilan taqdirlandi. Navoiy asarlaridan parchalar yozilgan tarqatma materiallar yo‘lovchilarga tarqatildi.
Ma’lumot uchun, Alisher Navoiy bekati 1984-yilning 8-dekabrida ishga tushirilgan bo‘lib, dunyodagi eng go‘zal metro bekatlaridan biri hisoblanadi.
Izoh (0)