Oxirgi 25 yil ichida Parkinson bilan kasallanish ikki barobarga ortdi. Endilikda olimlar yangi prognozni e’lon qildi. Unga ko‘ra, kasallanish yana ikki barobarga ortadi, lekin bu safar 10 yil ichida. Kasallik esa haligacha davosiz qolmoqda.
Nevrologik buzulishlar — butun dunyoda nogironlikning asosiy sababi hisoblanadi. Progressiv tarzda o‘sayotgan kasalliklardan biri esa Parkinsondir. Parkinson kasalligi harakat funksiyalari zararlanadigan va mushaklar nazorati susayadigan, davosi noma’lum bo‘lgan neyrodegenerativ kasallik.
Parkinson kasalligidan asosan keksalar aziyat chekadi. Olimlarning prognoziga ko‘ra, 2050-yilga borib 60 yoshdan katta bo‘lgan qariyalar soni 2 milliardga yetadi.
Tadqiqot mualliflari noxush faktlarni keltirgan. 1990-yildan 2015-yilgacha Parkinson bilan og‘rigan insonlar soni ikki barobarga ortgan. 2040-yilga borib ular soni 12 millionga yetadi. Hayot davomiyligi uzayishiga olib kelayotgan qo‘shimcha omillar va sanoatlashuvning salbiy ta’siri tufayli bu ko‘rsatkich 17 milliongacha borishi mumkin.
Ekologiyaning ahamiyati
Mualliflar jamoatchilik diqqatini sanoatlashuvning salbiy oqibatlariga qaratishga chaqirmoqda. Uning mahsulotlari bo‘lgan pestitsidlar, og‘ir metallar Parkinson kasalligi rivojlanishiga olib keladi. Insoniyat bu omillar ta’sirini qisqartirishi yoki butunlay yo‘qotib yuborishga qodir.
“O‘n yildan so‘ng biz haqiqatan ham pandemiya haqida gapirishimiz mumkin. Shunday ekan, barcha imkoniyatlarmizni xalq orasida profilaktika chora-tadbirlariga va bu kasallik bilan og‘rigan bemorlar parvarishini kengaytirishga qaratishimiz lozim”, — deydi tadqiqotning yetakchi muallifi Reya Dorsi.
Yana bir muhim jihatlardan biri kasallikni davolash yoki kechishini sekinlashtirish uchun yangi dori preparatlarini yaratish sanaladi. Buning ustida tinimsiz izlanishlar olib borilmoqda. Yaqinda Yaponiyada indutsirlangan asos hujayralarni Parkinson kasalligini davolash uchun 50 yoshli bemor miyasiga ko‘chirib o‘tkazishdi. Dastlabki natijalar davo usuli xavfsiz ekanini ko‘rsatmoqda.
Izoh (0)