1968-yildan buyon Fanlar akademiyasi Genetika va o‘simliklar eksperimental biologiyasi institutida faoliyat yuritib kelayotgan Tilov Muhiddinov 79 yoshida fan doktori bo‘ldi. Bu haqda “Daryo”ga FA matbuot xizmati ma’lum qildi.
Dastlab katta laborant, kichik ilmiy xodim, ilmiy xodim, katta ilmiy xodim, yetakchi ilmiy xodim lavozimlarida ishlagan olim 1997-yilda biologiya fanlari nomzodi ilmiy darajasini olish uchun “G‘o‘zada kleystogam gul bilan xo‘jalik belgilarining o‘zgaruvchanlik va irsiyat asosida bog‘lanishi” mavzusi yuzasidan dissertatsiya ishini himoya kilgan. Uning ishi yirik olimlar tomonidan so‘nggi 35 yil ichida qilingan eng yuqor saviyadagi jahon ahamiyatiga molik tadqiqot sifatida e’tirof etilgan.
Tilov Muhiddinov uzoq yillik izlanishlari natijasida 2018-yilda “G‘o‘zada xazmogam va kleystogam gullash belgilarini tadqiq etish asosida intensiv xususiyatli navlar yaratish” mavzusida doktorlik dissertatsiyasini muvaffaqiyatli himoya qildi.
— U kishi uzoq yillar davomida shu dargohda samarali faoliyat yuritib, ustoz-shogird an’anasini davom ettirmoqda. Ilmiy izlanishlardan bir zum ham to‘xtamadi, 79 yoshida doktorlik dissertatsiyasini himoya qildi. Ustoz shu jihati bilan ham barchaga o‘rnak bo‘la oladi, — deydi institut direktori Abdujalil Narimonov.
Tilov Muhiddinov o‘rta tolali, kleystogam gulli va yirik chanoqli navlar yaratish ustida ilmiy izlanishlar olib bormoqda. Ushbu tadqiqotlarning natijasi o‘laroq 80 dan ortiq ilmiy maqolalar, amaliy-uslubiy qo‘llanmalar chop etgan.
Izoh (0)