Jahon banki bilan hamkorlikda amalga oshirilayotgan “Oliy ta’limni modernizatsiya qilish” loyihasi doirasida ta’lim sifatini oshirish bo‘yicha xalqaro ekspert Bastian Baumann Oliy ta’lim tizimida ta’lim sifatini oshirish va uning xalqaro raqobatdoshligini ta’minlash masalalari bo‘yicha O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi rahbarining maslahatchisi lavozimiga tayinlandi. Bu haqda inspeksiya axborot xizmatiga tayanib, O‘zA xabar bermoqda.
Davlat rahbarining 2019-yil 16-yanvardagi “Ta’lim sifatini nazorat qilish tizimini takomillashtirish bo‘yicha qo‘shimcha chora-tadbirlar” to‘g‘risidagi qarori asosida Davlat inspeksiyasi tarkibiy tuzilmasiga Maslahatchi lavozimi kiritilgan.
“Davlat inspeksiyasi faoliyatida ta’lim sifatini xalqaro darajada ko‘tarish, tan olingan xorijiy tajribalarni milliy ta’lim tizimi xususiyatlarini inobatga olgan holda joriy etish, bu borada boshqa davlatlar yo‘l qo‘ygan xatolarni takrorlamaslik kabi ustuvor vazifalar belgilangan. Bu vazifalarni sifatli bajarishda ta’lim sifatini ta’minlash bo‘yicha xalqaro darajada tan olingan ekspert Bastian Baumann o‘zining uzoq yillik tajribasi va malakasi bilan bizga ko‘maklashadi” — deb ta’kidladi Ta’lim sifatini nazorat qilish davlat inspeksiyasi boshlig‘i U. Toshkenboyev.
Hozirda tajribali ekspert boshchiligida qator yo‘nalishlarda ishlar amalga oshirila boshlandi. Jumladan, ta’lim muassasalarini attestatsiyadan va davlat akkreditatsiyasidan o‘tkazish tartibini takomillashtirish bo‘yicha hukumat qarori loyihasi ishlab chiqilmoqda. Hozirda 2006-yil 10-fevralda Vazirlar mahkamasining 21-sonli qarori bilan tasdiqlangan “O‘zbekiston Respublikasi ta’lim muassasalari va nodavlat ta’lim xizmatlari ko‘rsatuvchi yuridik shaxslarning davlat akkreditatsiyasidan o‘tkazish tartibi to‘g‘risidagi nizom” asosida ish yuritib kelinmoqda. Mazkur qarorning ko‘plab bandlariga qo‘shimcha o‘zgartirishlar kiritilganligiga qaramay, uning mazmun-mohiyati zamonaviy ta’lim tizimi talablariga mos kelmaydi.
“Ta’lim sifatini nazorat qilish tizimini takomillashtirish bo‘yicha qo‘shimcha chora-tadbirlar” to‘g‘risidagi prezident qarorida 2019-yil 1-aprelga qadar ilg‘or xorijiy tajribalarni o‘rganish natijalariga ko‘ra, ta’lim muassasalarini attestatsiyadan va davlat akkreditatsiyasidan o‘tkazish tartibini takomillashtirish bo‘yicha hukumat qarori loyihasi ishlab chiqilishi ko‘zda tutilgan. Rejadagi qaror loyihasi Ta’lim sifatini nazorat qilish davlat inspeksiyasi mutaxassislari tomonidan tayyorlangan bo‘lib, undagi barcha qismlar xalqaro ekspert ishtirokida ko‘rib chiqilmoqda, xususan janob Baumanning ko‘p yillik faoliyati davomida egallangan malaka va tajribalari asosida yanada takomillashtirilmoqda.
Shuningdek, ish jarayonida “Oliy ta’limni modernizatsiya qilish” loyihasi doirasida O‘zbekistonda oliy ta’lim tizimining boshqaruv salohiyatini mustahkamlash, mehnat bozorida kadrlar sifati, dolzarbligi va tanlangan oliy ta’lim muassasalarining o‘quv muhitini yaxshilash bo‘yicha takliflar ishlab chiqilmoqda.
Xususan OTMlarda boshqaruv jarayonini yaxshilash maqsadida yangi asosiy menejer lavozimi ta’sis etilishi tavsiya qilindi. Mazkur lavozimga esa maxsus malaka oshirish kurslarida boshqaruvchilik tajribalarini puxta egallagan mutaxassislar tayinlanishi taklif sifatida keltirildi. Negaki, OTMlarda boshqaruv tizimining yaxshi yo‘lga qo‘yilishi mazkur muassasaning ko‘plab yo‘nalishlardagi samarali faoliyatini ta’minlashi mumkin.
Ekspertning fikricha, oliy ta’lim muassalariga qabul kvotalarini belgilashda mustaqillik berish birdaniga emas, balki bosqichma-bosqich, turli faktorlarni inobatga olgan xolda amalga oshirilishi maqsadga muvofiq. Mustaqillik berish yoppasiga emas, ayrim oliy ta’lim muassasalarida dastlab sinovdan o‘tkazib ko‘rilishi kelgusiga kelib chiqishi mumkin bo‘lgan ko‘plab muammolarning oldini olishi mumkinligini qayd etdi.
Ma’lumot o‘rnida: Bastian Baumann – Xalqaro darajadagi huquqshunos, oliy ta’lim tizimini rivojlantirish bo‘yicha Yevropa sifat kafolati agentligi (EQAA) boshqaruvchi direktori bo‘lish bilan bir qatorda quyidagi nufuzli xalqaro tashkilotlarda ekspert lavozimlarida faoliyat yuritib kelmoqda: DAAD (Germaniya akademik almashinuv xizmati), ADEC (Abu-Dabi milliy sifatni kafolati agentligi), EQE (Gruziya milliy sifat kafolati agentligi), QQA (Bahrayn milliy sifat kafolati agentligi), SKVC (Litva milliy sifat kafolati agentligi) va boshqalar. Shuningdek Belorussiya, Misr, Ozarbayjon, Qozog‘iston kabi davlatlarda oliy ta’lim tizimida islohotlar qilinishida katta hissa qo‘shgan, bu borada 17 yillik ish tajribasiga ega.
Izoh (0)