Жаҳон банки билан ҳамкорликда амалга оширилаётган «Олий таълимни модернизация қилиш» лойиҳаси доирасида таълим сифатини ошириш бўйича халқаро эксперт Бастиан Бауманн Олий таълим тизимида таълим сифатини ошириш ва унинг халқаро рақобатдошлигини таъминлаш масалалари бўйича Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси раҳбарининг маслаҳатчиси лавозимига тайинланди. Бу ҳақда инспекция ахборот хизматига таяниб, ЎзА хабар бермоқда.
Давлат раҳбарининг 2019 йил 16 январдаги «Таълим сифатини назорат қилиш тизимини такомиллаштириш бўйича қўшимча чора-тадбирлар» тўғрисидаги қарори асосида Давлат инспекцияси таркибий тузилмасига Маслаҳатчи лавозими киритилган.
«Давлат инспекцияси фаолиятида таълим сифатини халқаро даражада кўтариш, тан олинган хорижий тажрибаларни миллий таълим тизими хусусиятларини инобатга олган ҳолда жорий этиш, бу борада бошқа давлатлар йўл қўйган хатоларни такрорламаслик каби устувор вазифалар белгиланган. Бу вазифаларни сифатли бажаришда таълим сифатини таъминлаш бўйича халқаро даражада тан олинган эксперт Бастиан Бауманн ўзининг узоқ йиллик тажрибаси ва малакаси билан бизга кўмаклашади» — деб таъкидлади Таълим сифатини назорат қилиш давлат инспекцияси бошлиғи У. Тошкенбоев.
Ҳозирда тажрибали эксперт бошчилигида қатор йўналишларда ишлар амалга оширила бошланди. Жумладан, таълим муассасаларини аттестациядан ва давлат аккредитациясидан ўтказиш тартибини такомиллаштириш бўйича ҳукумат қарори лойиҳаси ишлаб чиқилмоқда. Ҳозирда 2006 йил 10 февралда Вазирлар маҳкамасининг 21-сонли қарори билан тасдиқланган «Ўзбекистон Республикаси таълим муассасалари ва нодавлат таълим хизматлари кўрсатувчи юридик шахсларнинг давлат аккредитациясидан ўтказиш тартиби тўғрисидаги низом» асосида иш юритиб келинмоқда. Мазкур қарорнинг кўплаб бандларига қўшимча ўзгартиришлар киритилганлигига қарамай, унинг мазмун-моҳияти замонавий таълим тизими талабларига мос келмайди.
«Таълим сифатини назорат қилиш тизимини такомиллаштириш бўйича қўшимча чора-тадбирлар» тўғрисидаги президент қарорида 2019 йил 1 апрелга қадар илғор хорижий тажрибаларни ўрганиш натижаларига кўра, таълим муассасаларини аттестациядан ва давлат аккредитациясидан ўтказиш тартибини такомиллаштириш бўйича ҳукумат қарори лойиҳаси ишлаб чиқилиши кўзда тутилган. Режадаги қарор лойиҳаси Таълим сифатини назорат қилиш давлат инспекцияси мутахассислари томонидан тайёрланган бўлиб, ундаги барча қисмлар халқаро эксперт иштирокида кўриб чиқилмоқда, хусусан жаноб Бауманнинг кўп йиллик фаолияти давомида эгалланган малака ва тажрибалари асосида янада такомиллаштирилмоқда.
Шунингдек, иш жараёнида «Олий таълимни модернизация қилиш» лойиҳаси доирасида Ўзбекистонда олий таълим тизимининг бошқарув салоҳиятини мустаҳкамлаш, меҳнат бозорида кадрлар сифати, долзарблиги ва танланган олий таълим муассасаларининг ўқув муҳитини яхшилаш бўйича таклифлар ишлаб чиқилмоқда.
Хусусан ОТМларда бошқарув жараёнини яхшилаш мақсадида янги асосий менежер лавозими таъсис этилиши тавсия қилинди. Мазкур лавозимга эса махсус малака ошириш курсларида бошқарувчилик тажрибаларини пухта эгаллаган мутахассислар тайинланиши таклиф сифатида келтирилди. Негаки, ОТМларда бошқарув тизимининг яхши йўлга қўйилиши мазкур муассасанинг кўплаб йўналишлардаги самарали фаолиятини таъминлаши мумкин.
Экспертнинг фикрича, олий таълим муассаларига қабул квоталарини белгилашда мустақиллик бериш бирданига эмас, балки босқичма-босқич, турли факторларни инобатга олган холда амалга оширилиши мақсадга мувофиқ. Мустақиллик бериш ёппасига эмас, айрим олий таълим муассасаларида дастлаб синовдан ўтказиб кўрилиши келгусига келиб чиқиши мумкин бўлган кўплаб муаммоларнинг олдини олиши мумкинлигини қайд этди.
Маълумот ўрнида: Бастиан Бауманн – Халқаро даражадаги ҳуқуқшунос, олий таълим тизимини ривожлантириш бўйича Европа сифат кафолати агентлиги (EQAA) бошқарувчи директори бўлиш билан бир қаторда қуйидаги нуфузли халқаро ташкилотларда эксперт лавозимларида фаолият юритиб келмоқда: DAAD (Германия академик алмашинув хизмати), ADEC (Абу-Даби миллий сифатни кафолати агентлиги), EQE (Грузия миллий сифат кафолати агентлиги), QQA (Баҳрайн миллий сифат кафолати агентлиги), SKVC (Литва миллий сифат кафолати агентлиги) ва бошқалар. Шунингдек Белоруссия, Миср, Озарбайжон, Қозоғистон каби давлатларда олий таълим тизимида ислоҳотлар қилинишида катта ҳисса қўшган, бу борада 17 йиллик иш тажрибасига эга.
Изоҳ (0)