2019-yilning 2-fevral kuni ba’zi bir ijtimoiy tarmoqlarda “‘Jasliq’ mahkumi Iskandar Xudoyberganovning ahvoli og‘irlashdi” sarlavhasi ostida xabar tarqatildi. Bu haqda O‘zbekiston Respublikasi IIV rasmiy munosabatida aytiladi.
Unda Qoraqalpog‘iston Respublikasida joylashgan 19-son jazoni ijro etish koloniyasida jazo muddatini o‘tayotgan, 44 yoshli Iskandar Xudayberganovning amakisi oldiga militsiya xodimi kelib, uning ahvoli o‘ta og‘irligi, jiddiy kasallanganligi hamda zudlik bilan xabar olish lozimligini aytganligi haqida bayon qilingan.
O‘zbekiston Respublikasi IIV Jazoni ijro etish bosh boshqarmasi bergan ma’lumotga ko‘ra, 1974-yilda Toshkent shahrida tug‘ilgan mahkum Iskandar Erkinovich Xudayberganov, 2002-yil 28-noyabr kuni Toshkent shahar sudi tomonidan O‘zbekiston Respublikasi Jinoyat kodeksining 155-moddasi (Terrorizm) 3-qismi, 156-moddasi (Milliy, irqiy, etnik yoki diniy adovat qo‘zg‘atish) 2-qismi, 159-moddasi (O‘zbekiston Respublikasi Konstitutsiyaviy tuzumiga tajovuz qilish) 4-qismi, 161-moddasi (Qo‘poruvchilik), 242-moddasi (Jinoiy uyushma tashkil etish) 2-qismi, 247-moddasi (O‘qotar qurol, o‘q-dorilar, portlovchi moddalar yoki portlatish qurilmalarini qonunga xilof ravishda egallash) 3-qismi, 248-moddasi (Qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) 1-qismi o‘lim jazosiga hukm qilingan va O‘zbekiston Respublikasi Oliy sudining ajrimiga asosan hukm o‘zgartirilib, 25 yil muddatga ozodlikdan mahrum etilgan.
Shuningdek, ma’lumotda mahkum I.Xudayberganovning yaqin qarindoshlari oldiga O‘zbekiston Respublikasi IIV Jazoni ijro etish bosh boshqarmasida yoki 19-son jazoni ijro etish koloniyasida xizmat qilayotgan xodimlardan birortasi bormaganligi hamda hozirgi kunda mahkum I.Xudayberganovning sog‘ligi qoniqarli darajada bo‘lib, statsionar yoki ambulator tartibda davolanishga muhtoj emasligi, u barcha mahkumlar qatori jazo muddatini o‘tayotganligi bildirilgan.
Izoh (0)