Jazolangan Hasan tabib, o‘quvchilarning sochini qaychilagan direktor o‘rinbosari, Qozog‘iston osmonidagi “uchta quyosh” va kunning boshqa muhim xabarlari

Shahrisabz shahridagi 7-umumta’lim maktabida o‘qituvchilar 6—10-sinflarda tahsil oluvchi o‘g‘il bolalar sochini qaychilab, ularning ustidan kulgan.

Direktorning ma’naviy-ma’rifiy ishlar bo‘yicha o‘rinbosari Shahboz Islomov o‘quvchilar sochini qaychi bilan kesganini tan olib, holatga quyidagicha izoh berdi. “O‘quvchini izza qilish maqsadida qilinmagan bu ishlar, shunchaki do‘stona munosabat bo‘lib, sochini oldirsin deb ko‘rinmaydigan joyidan kesganmiz”.

Keyinroq 7-umumta’lim maktabi direktorining ma’naviy-ma’rifiy ishlar bo‘yicha o‘rinbosari Shahboz Islomov o‘z arizasiga muvofiq ishdan bo‘shatilgani xabar qilindi.

***

Qozog‘iston osmonida “uchta quyosh” kuzatildi.

Prezident rezidensiyasi tepasida bir vaqtning o‘zida uchta quyosh paydo bo‘lgan. Guvohlardan biri uni suratga olgan.

Bunday optik hodisa tabiatda kam kuzatiladi. Olimlar buni “galo” deb ataydi.

***

Rossiya va amerikalik olimlar Orol dengizi yoshini aniqladi.

Tahlillar natijasidan ma’lum bo‘lishicha, Orol dengizi 17,6 ming yil avval paydo bo‘lgan. Taxminlarga ko‘ra, suvning asosiy manbalari, Terskey-Oltoy, Tyanshan va Pomir tog‘laridan erigan muzliklar bo‘lgan. Taxminan ikki ming yil o‘tgach unga daryo suvlari oqishi kamaygach, suvning sho‘rlik darajasi oshib ketgan.

***

O‘zbekiston karate federatsiyasi sobiq prezidenti Nurxon Nafasovga nisbatan jinoyat ishi qo‘zg‘atilgan.

O‘zbekiston milliy olimpiya qo‘mitasi taqdim etgan ma’lumotlar asosida 2018-yilning 16-noyabr kuni O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti tomonidan O‘zbekiston karate federatsiyasining sobiq raisi Nurxon Nafasov va boshqalarga nisbatan O‘zbekiston Respublikasi Jinoyat Kodeksining 167-moddasi (O‘zlashtirish yoki rastrata yo‘li bilan talon-toroj qilish) 3-qismi “a” bandi va 165-moddasi (Tovlamachilik) 1-qismi bilan jinoyat ishi qo‘zg‘atilgan.