O‘zbekiston Respublikasi Ichki ishlar vazirligi Malaka oshirish instituti tomonidan Qashqadaryo viloyatida soha vakillari uchun sayyor o‘quv yig‘inlari o‘tkazilmoqda. Bu haqda O‘zA xabar berdi.
O‘zbekiston Respublikasi Ichki ishlar vazirligi Qashqadaryo akademik litseyida bo‘lib o‘tayotgan ushbu yig‘inlarda Qarshi shahar ichki ishlar organlari faoliyatini muvofiqlashtirish boshqarmasi, barcha tuman ichki ishlar bo‘limlari boshliqlari, ularning o‘rinbosarlari, shuningdek, profilaktika inspektorlari xizmat faoliyatidan ajralmagan holda ishtirok etmoqda.
O‘quv yig‘iniga jalb etilgan rahbar xodimlarga joylardagi ichki ishlar organlarida xizmatni to‘g‘ri tashkil qilishi uchun tizimdagi islohotlar, huquqbuzarliklar profilaktikasi samaradorligini oshirish, jinoyatlarning oldini olish va tezkor fosh etish, jamoat xavfsizligini ta’minlash, fuqarolar huquqi va erkinliklari, qonuniy manfaatlarini himoya qilish borasidagi muammolar va ularning yechimi yuzasidan tegishli tavsiyalar berilmoqda.
– Besh kunlik o‘quv mashg‘ulotlari muassasamiz professor-o‘qituvchilari hamda vazirlik sohaviy xizmatlarining tajribali mutaxassislari tomonidan innovatsion pedagogik texnologiyalar yordamida olib borilmoqda, – deydi Ichki ishlar vazirligi Malaka oshirish instituti kafedra boshlig‘i, podpolkovnik Akmal Boboyev. – Xususan, “Aqliy hujum”, “Blits-so‘rov” va boshqa zamonaviy interaktiv metodlardan foydalanib, tuman va shaharlar kesimida ichki ishlar organlari faoliyati bilan bog‘liq ayrim masalalar chuqur tahlil qilinayapti. Barcha o‘quv mashg‘ulotlarida jinoyatchilikka qarshi kurashish borasidagi ilg‘or xorijiy tajribalar misolida ularni amaliyotga joriy etish usullari muhokama qilinmoqda. Alohida guruhda tuman va shaharlarda faoliyat yuritayotgan 24 nafar profilaktika inspektori bilan mashg‘ulotlar o‘tkazilmoqda.
Shuningdek, viloyat ichki ishlar boshqarmasida Istiqbolli yosh kadrlar zaxirasiga kiritilgan xodimlar bilan shaxsiy tarkibni boshqarish, rahbarlik qilish va tashkilotchilik qobiliyatini shakllantirish, ularning bilimi, kasb mahoratini oshirishga qaratilgan o‘quv mashg‘ulotlari o‘tkaziladi.
Sayyor o‘quv yig‘inida ishtirok etgan xodimlarga belgilangan namunadagi sertifikatlar topshiriladi.
Izoh (0)