Жазоланган Ҳасан табиб, ўқувчиларнинг сочини қайчилаган директор ўринбосари, Қозоғистон осмонидаги «учта қуёш» ва куннинг бошқа муҳим хабарлари

Шаҳрисабз шаҳридаги 7-умумтаълим мактабида ўқитувчилар 6—10-синфларда таҳсил олувчи ўғил болалар сочини қайчилаб, уларнинг устидан кулган.

Директорнинг маънавий-маърифий ишлар бўйича ўринбосари Шаҳбоз Исломов ўқувчилар сочини қайчи билан кесганини тан олиб, ҳолатга қуйидагича изоҳ берди. «Ўқувчини изза қилиш мақсадида қилинмаган бу ишлар, шунчаки дўстона муносабат бўлиб, сочини олдирсин деб кўринмайдиган жойидан кесганмиз».

Кейинроқ 7-умумтаълим мактаби директорининг маънавий-маърифий ишлар бўйича ўринбосари Шаҳбоз Исломов ўз аризасига мувофиқ ишдан бўшатилгани хабар қилинди.

***

Қозоғистон осмонида «учта қуёш» кузатилди.

Президент резиденцияси тепасида бир вақтнинг ўзида учта қуёш пайдо бўлган. Гувоҳлардан бири уни суратга олган.

Бундай оптик ҳодиса табиатда кам кузатилади. Олимлар буни «гало» деб атайди.

***

Россия ва америкалик олимлар Орол денгизи ёшини аниқлади.

Таҳлиллар натижасидан маълум бўлишича, Орол денгизи 17,6 минг йил аввал пайдо бўлган. Тахминларга кўра, сувнинг асосий манбалари, Терскей-Олтой, Тяншан ва Помир тоғларидан эриган музликлар бўлган. Тахминан икки минг йил ўтгач унга дарё сувлари оқиши камайгач, сувнинг шўрлик даражаси ошиб кетган.

***

Ўзбекистон каратэ федерацияси собиқ президенти Нурхон Нафасовга нисбатан жиноят иши қўзғатилган.

Ўзбекистон миллий олимпия қўмитаси тақдим этган маълумотлар асосида 2018 йилнинг 16 ноябрь куни Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти томонидан Ўзбекистон каратэ федерациясининг собиқ раиси Нурхон Нафасов ва бошқаларга нисбатан Ўзбекистон Республикаси Жиноят Кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а» банди ва 165-моддаси (Товламачилик) 1-қисми билан жиноят иши қўзғатилган.