13-yanvar kuni Isroil armiyasi Livanning “Hizbulloh” guruhi tomonidan Isroilning Livan bilan chegarasida qazilgan tunnellarning barchasini fosh qilganini ma’lum qildi. Bu haqda Fransiyaning Le Monde nashri xabar bermoqda.
2018-yilning 4-dekabr kuni Isroil armiyasi mamlakatning Livan bilan chegara qismida Livanning “Hizbulloh” guruhi tomonidan qazilgan va Isroil xavfsizligiga tahdid solishi mumkin deya hisoblangan tunnellarni aniqlash va yo‘q qilish maqsadida “Shimol qal’asi” nomli harbiy amaliyot boshlagan edi. Bugungi kunga kelib Isroil armiyasi ushbu amaliyot natijasida barcha 6 tunnelni fosh qilganini va ular yaqin kunlarda yo‘q qilinishini ma’lum qilgan. Oxirgi topilgan tunnel Livanning Isroildan 800 metr uzoqlikda joylashgan Ramya qishlog‘ida boshlangan va Isroil hududiga bir necha 10 kilometr masofaga cho‘zilgan. Uning chuqurligi 55 metr bo‘lib, bu mavjud tunnellar ichida eng chuquri hisoblanadi.
O‘z navbatida, Yaman xavfsizlik xizmatlarining ma’lumot berishicha, Isroil armiyasi tomonidan ikki davlat chegarasidagi demarkatsiya hududida topilgan tunnellar eski va foydalanilmaydigan tunnellardir. Manbalarning ta’kidlashicha, topilgan tunnellarning mavjudligidan Isroil tomoni ancha oldin xabar topgan va ulardan endilikda siyosiy maqsadlarda foydalanmoqda.
Bundan tashqari, Isroil kuchlari qurilish mexanizmlari, burg‘ulash asboblari va arxitektura jihatdan yaxshi ishlangan yer osti yo‘li suratlarini tunnel suratlari deya tarqatgan.
Isroil va “Hizbulloh” o‘rtasidagi so‘nggi qarama-qarshilik 2006-yilda yuz bergan edi. 33 kun davom etgan urush natijasida Livan tomonidan 1200 kishi, Isroil tomonidan 166 kishi vafot etgan edi. Urush yakunida 1701 sonli BMT rezolyutsiyasi qabul qilingan va ikki davlat chegarasida Ko‘k liniya belgilangan. Isroil hamda Livan hamon urush holatida qolmoqda.
Izoh (0)