13 январь куни Исроил армияси Ливаннинг «Ҳизбуллоҳ» гуруҳи томонидан Исроилнинг Ливан билан чегарасида қазилган туннелларнинг барчасини фош қилганини маълум қилди. Бу ҳақда Франциянинг Le Monde нашри хабар бермоқда.
2018 йилнинг 4 декабрь куни Исроил армияси мамлакатнинг Ливан билан чегара қисмида Ливаннинг «Ҳизбуллоҳ» гуруҳи томонидан қазилган ва Исроил хавфсизлигига таҳдид солиши мумкин дея ҳисобланган туннелларни аниқлаш ва йўқ қилиш мақсадида «Шимол қалъаси» номли ҳарбий амалиёт бошлаган эди. Бугунги кунга келиб Исроил армияси ушбу амалиёт натижасида барча 6 туннелни фош қилганини ва улар яқин кунларда йўқ қилинишини маълум қилган. Охирги топилган туннель Ливаннинг Исроилдан 800 метр узоқликда жойлашган Рамя қишлоғида бошланган ва Исроил ҳудудига бир неча 10 километр масофага чўзилган. Унинг чуқурлиги 55 метр бўлиб, бу мавжуд туннеллар ичида энг чуқури ҳисобланади.
Ўз навбатида, Яман хавфсизлик хизматларининг маълумот беришича, Исроил армияси томонидан икки давлат чегарасидаги демаркация ҳудудида топилган туннеллар эски ва фойдаланилмайдиган туннеллардир. Манбаларнинг таъкидлашича, топилган туннелларнинг мавжудлигидан Исроил томони анча олдин хабар топган ва улардан эндиликда сиёсий мақсадларда фойдаланмоқда.
Бундан ташқари, Исроил кучлари қурилиш механизмлари, бурғулаш асбоблари ва архитектура жиҳатдан яхши ишланган ер ости йўли суратларини туннель суратлари дея тарқатган.
Исроил ва «Ҳизбуллоҳ» ўртасидаги сўнгги қарама-қаршилик 2006 йилда юз берган эди. 33 кун давом этган уруш натижасида Ливан томонидан 1200 киши, Исроил томонидан 166 киши вафот этган эди. Уруш якунида 1701 сонли БМТ резолюцияси қабул қилинган ва икки давлат чегарасида Кўк линия белгиланган. Исроил ҳамда Ливан ҳамон уруш ҳолатида қолмоқда.
Изоҳ (0)