Uzbekistan Airways milliy aviakompaniyasiga qarashli Boeing 787-8 Dreamliner 11-yanvar kuni Dubaydan uchib kelgandan so‘ng, reysdan olingan. Xabarlarga ko‘ra uning motoridan qirindi topilgan. Motor shu qirindi hisobiga ishdan chiqqan. Bu haqda UZ24 xabar berdi.
Registratsiya raqami UK-78701 bo‘lgan bu samolyot yaqin vaqtdagi ishdan chiqqan “O‘zbekiston havo yo‘llari” shirkati ixtiyoridagi ikkinchi Dreamliner’dir.
Hozircha Uzbekistan Airways rahbariyati hali ikki yil ham ishlatilmagan eng qimmat yo‘lovchi samolyotlarining ketma-ket ishdan chiqayotgani haqida rasmiy axborot bermadi.
Avvalroq “O‘zbekiston havo yo‘llari” milliy aviakompaniyasi “Ozodlik” nashri tomonidan tarqatilgan Boeing-787 Dreamliner samolyotining nosozligi haqidagi xabarni rad etgandi. Nashrning yozishicha, dvigatel nosozligi va tushunarsiz shovqinlar sababli 24-dekabr kuni HY604 Moskva—Toshkent reysi bir tarim soatga ushlanib qolgan va ekipaj nosoz samolyotda ortga uchishga majbur bo‘lgan. Uzbekistan Airways xabariga ko‘ra, reys haqiqatan ham 1 soat 18 daqiqaga ushlanib qolgan. Ushlanib qolishga yo‘lovchilarni samolyotga chiqarish va havo kemasining muzlashga qarshi ishlovi bilan bog‘liq masalalar sabab bo‘lgan.
Izoh (0)