O‘zbekiston Respublikasi Prezidentining 2018-yil 27-iyuldagi “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari to‘g‘risida”gi farmoniga ko‘ra Namangan viloyati Davlat soliq idoralari tomonidan tegishli ishlar amalga oshirilmoqda, deyiladi O‘zA xabarida.
Xususan, mazkur hujjat ijrosini ta’minlash borasida amalga oshirilgan ishlar samarasi o‘laroq o‘tgan 2018-yilda faoliyatini qayta tiklagan va davlat ro‘yxatidan o‘tgan 1 ming 935 yakka tartibdagi tadbirkorlik subyektining soliq va moliyaviy jarimadan bo‘lgan 196,9 milliard so‘m qarzi hisobdan chiqarildi.
– Shu o‘rinda aytib o‘tish joizki, – deydi viloyat Davlat soliq boshqarmasi bosh inspektori H.Madumarov. – Farmonga ko‘ra, 2018-yilning 1-apreliga qadar yakka tartibdagi tadbirkor maqomini yo‘qotgan jismoniy shaxslarga va ushbu sanadan moliyaviy-xo‘jalik faoliyatini amalga oshirmayotgan yakka tartibdagi tadbirkorlarga, davlat ro‘yxatidan o‘tmasdan tadbirkorlik faoliyati bilan shug‘ullanganligi uchun bir yillik qat’iy belgilangan soliq summasi hisoblangan jismoniy shaxslarga qat’iy belgilangan soliq va ushbu qarzdorlik uchun hisoblangan penyalar bo‘yicha qarzdorlikni, shuningdek, moliyaviy jarimalarni hisobdan chiqarish haqida qaror qabul qilingan edi. Endilikda, yangi qabul qilingan tegishli hujjatga ko‘ra, faoliyat yuritmayotgan yakka tartibdagi tadbirkorlarning soliq qarzlari va jarima sanksiyalari hisobdan chiqarilganda ular tiklanishi mumkin bo‘lgan muddat yoki yakka tartibdagi tadbirkorlar uchun “soliq amnistiyasi” 6 oyga uzaytirildi.
Yakka tartibdagi tadbirkorlar soliq qarzdorligi, penya, jarimalar va davlat bojlarini to‘lab, 2019-yil 1-iyulgacha faoliyatlarini tiklashlari va ishlarini davom ettirishlari mumkin bo‘ladi.
Izoh (0)