Toshkent viloyatida 22 ta “Bo‘lg‘usi kelin-kuyovlar innovatsion maktabi” ochildi
O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi tashabbusi bilan dastlab Toshkent viloyatining Parkent tumanida amalga oshirilgan loyihada FHDYoga ariza bergan 150 nafar nikohlanuvchilarning o‘quv kurslari yuqori saviyada tashkil etilib, muvaffaqiyatli amalga oshirildi va ko‘pchilikning e’tirofiga sazovor bo‘ldi. Bu haqda O‘zA xabar bermoqda.
Foto: O‘zA
“Oila - millat iftixori, yurt tayanchi, kelajak poydevori” mavzusidagi o‘quv kurslari o‘tgan yilning avgust oyida boshlangan bo‘lib, o‘tgan besh oy davomida malakali va tajribali pedagog-mutaxassislar tomonidan huquq, ma’naviyat, iqtisod, reproduktiv salomatlik, psixologiya va din asoslari bo‘yicha bilim va ko‘nikmalar berildi. Sertifikatlarga ega bo‘lgan tinglovchilar hayot saboqlaridan behad mamnun bo‘ldi.
O‘zbekiston Respublikasi Vazirlar Mahkamasi huzuridagi “Oila” ilmiy-tadqiqot markazi tomonidan 2018-yil 22-noyabrda tasdiqlangan “Yo‘riqnoma”ga asosan Qoraqalpog‘iston Respublikasi, Toshkent shahar va viloyatlarda innovatsion maktablar tashkil etilmoqda.
Vazirlar Mahkamasi huzuridagi “Oila” ilmiy-amaliy tadqiqot markazining Toshkent viloyati boshqarmasi tomonidan viloyatning har bir tuman va shaharlarida mazkur maktablarning ochilishi haqiqiy bayramga aylandi.
Tadbirlarda viloyatning barcha tuman va shahar hokimlari, hamkor tashkilotlardan Xotin-qizlar qo‘mitasi, tuman FHDYo bo‘limi, “Mahalla” xayriya jamoat fondi, Respublika “Ma’naviyat va ma’rifat” markazi tuman bo‘limi, tuman tibbiyot birlashmasi, Xalq ta’limi tuman bo‘limi, siyosiy partiyalarning tuman bo‘limlari, tuman bosh imom-xatibi va otinoyilari o‘zlarining ma’ruzalarida oilaviy hayot asoslari bo‘yicha o‘qitishning mazmun-mohiyati haqida gapirib o‘tdi.
Izoh (0)