Ўзбекистон Республикаси Президентининг 2018 йил 27 июлдаги «Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида»ги фармонига кўра Наманган вилояти Давлат солиқ идоралари томонидан тегишли ишлар амалга оширилмоқда, дейилади ЎзА хабарида.
Хусусан, мазкур ҳужжат ижросини таъминлаш борасида амалга оширилган ишлар самараси ўлароқ ўтган 2018 йилда фаолиятини қайта тиклаган ва давлат рўйхатидан ўтган 1 минг 935 якка тартибдаги тадбиркорлик субъектининг солиқ ва молиявий жаримадан бўлган 196,9 миллиард сўм қарзи ҳисобдан чиқарилди.
– Шу ўринда айтиб ўтиш жоизки, – дейди вилоят Давлат солиқ бошқармаси бош инспектори Ҳ.Мадумаров. – Фармонга кўра, 2018 йилнинг 1 апрелига қадар якка тартибдаги тадбиркор мақомини йўқотган жисмоний шахсларга ва ушбу санадан молиявий-хўжалик фаолиятини амалга оширмаётган якка тартибдаги тадбиркорларга, давлат рўйхатидан ўтмасдан тадбиркорлик фаолияти билан шуғулланганлиги учун бир йиллик қатъий белгиланган солиқ суммаси ҳисобланган жисмоний шахсларга қатъий белгиланган солиқ ва ушбу қарздорлик учун ҳисобланган пенялар бўйича қарздорликни, шунингдек, молиявий жарималарни ҳисобдан чиқариш ҳақида қарор қабул қилинган эди. Эндиликда, янги қабул қилинган тегишли ҳужжатга кўра, фаолият юритмаётган якка тартибдаги тадбиркорларнинг солиқ қарзлари ва жарима санкциялари ҳисобдан чиқарилганда улар тикланиши мумкин бўлган муддат ёки якка тартибдаги тадбиркорлар учун «солиқ амнистияси» 6 ойга узайтирилди.
Якка тартибдаги тадбиркорлар солиқ қарздорлиги, пеня, жарималар ва давлат божларини тўлаб, 2019 йил 1 июлгача фаолиятларини тиклашлари ва ишларини давом эттиришлари мумкин бўлади.
Изоҳ (0)