Navoiy viloyati Zarafshon shahri markazida o‘rnatilgan Yangi yil bayrami archasi aholi taklifi bilan zamonaviy va mahobatlisiga almashtirildi, deb yozadi O‘zA.
Qisqa muddatda zarafshonliklar kutganidan-da ziyoda – balandligi 22 metr bo‘lgan archa o‘rnatildi. Qariyb 320 million so‘m mablag‘ evaziga tayyorlangan markaziy maydondagi archa atrofi odamlar bilan gavjum. Yangi yilning ko‘tarinki kayfiyati dillardan-dillarga ko‘chmoqda.
– Yanglishmasam, qariyb 15 yildan buyon bayramni shahrimiz markaziga o‘rnatilgan eski, ko‘rimsiz archa atrofida o‘tkazar edik, – deydi Munisa A’zamova. – Endi Zarafshon shahriga kelgan mehmonni bosh maydonimizdagi Yangi yil archasiga hech bir istiholasiz olib boramiz. Bolalarimiz bilan kechki sayr uyushtirib, ulkan monitorda bayramoldi konsert dasturlarini tomosha qilyapmiz.
Aholiga qulaylik yaratish maqsadida Yangi yil archasi atrofida shahar hokimligi tomonidan arzonlashtirilgan narxlarda savdo pavilonlari tashkil etildi. 52,5 million so‘m evaziga barpo etilgan zamonaviy ko‘chma savdo nuqtalarida 10 dan ortiq asosiy turdagi mahsulotlar savdosi yo‘lga qo‘yilgan. Pavilyon ish tartibi aholi taklifiga ko‘ra soat 8:00 dan 19:00 gacha belgilangan.
Izoh (0)