Innovatsion rivojlanish vazirligi Surxondaryo viloyatidagi 20 ta maktabga Q-Box qurilmasini o‘rnatmoqda. Bu haqda “Daryo”ga vazirlik matbuot xizmati xabar berdi.
Q-Box chekka hududlardagi maktablar, kollejlar, OTMlar va boshqa ta’lim muassasalarida ta’lim olayotgan o‘quvchi hamda talabalar uchun mo‘ljallangan ta’lim dasturlari va ma’lumotlar bazasini o‘z ichiga olgan ulkan kontentdir. Unga kompyuter, smartfon, planshet, noutbuk orqali Wi-Fi’ga ulangandek kirib, o‘zi istagan resurslardan foydalanish mumkin. Boshqacha aytganda, internetga ulanmasdan turib, aynan ushbu tarmoq bera oladigan ma’lumotlarga egalik qilish imkoniyatini taqdim etadi.
Bundan tashqari, Q-Box’da ingliz, rus, fransuz, nemis, koreys, xitoy va boshqa tillarni o‘rgatuvchi zamonaviy interaktiv kurslar, tarjimonlar, ensiklopediyalar va boshqa kerakli o‘quv kurslari ham mavjud.
Q-Box maktab o‘quvchilarning darslik bilan bog‘liq muammolarini yechishda ham yordam beradi. Chunki unda barcha sinflarga oid kitoblarning elektron nusxasi bo‘ladi. Internet Q-Box moslamasi Alisher Navoiy nomidagi O‘zbekiston milliy kutubxonasidagi mavjud adabiyotlarning bosma shaklidagi barcha manbalarini o‘zida jamlay oladi.
Loyihaning ikkinchi bosqichi EDUBOOK uskunasi bilan maktablarni jihozlashdir. Arzon va bolalarning ilm olishi uchun moslashtirilgan maxsus dasturli EDUBOOK kompyuterlarida astronomiya, geometriya va chizmachilik, geografiyaga aloqador 3D chizmalar, maxsus labaratoriya ishlari va bolalar uchun raqamli kodlash dasturlari o‘rnatilgan.
Izoh (0)