Andijon viloyati IIB huzuridagi Tergov boshqarmasi tomonidan fuqarolarning kelgusida firibgarlikning qurboniga aylanib qolishlari oldini olish borasida muntazam tushuntirish-targ‘ibot ishlari o‘tkazilmoqda. Bu haqda “Daryo” muxbiri Mirolim Isajonov xabar bermoqda.
Deyarli har birimiz kundalik hayotimizda firibgarlarning shirin so‘zlari va katta va’dalariga uchib, ular tuzog‘iga ilingan insonlar bilan tez-tez muloqotda bo‘lamiz yohud dard-u hasratini tinglaymiz. Oxirgi paytlarda yaqin qarindoshlar, do‘st-u birodarlarning bir-birini chuv tushirishayotganidan hayratlanmay ham qo‘ydik. Ammo bunday hatti-harakatlar natijasida turli jinoyatlarning kelib chiqayotgani, ayniqsa, daxshatli voqealarning ro‘y berayotgani juda ham achinarlidir.
Butun dunyo mamlakatlarining og‘riqli muammosiga aylangan firibgarlik jinoyatini oldini olish maqsadida Andijon viloyati IIB huzuridagi Tergov boshqarmasi xodimlari tomonidan ham aholi orasida keng miqyosda tushuntirish-targ‘ibot ishlari olib borilmoqda.
Joriy yil viloyatda umumiy jinoyatchilik sezilarli darajada kamaygan bo‘lsa-da, ammo firibgarlik jinoyatlari salmog‘i pasayishi qiyin kechayotir. O‘tgan o‘n bir oy davomida 578 ta firibgarlik ishiga nisbatan tergov jarayonlari o‘tkazilgan bo‘lsa, shundan 124 tasi xotin-qizlar tomonidan sodir etilgan.
Boshqarmaning tuman va shahar bo‘limi xodimlari deyarli har kuni sektor ishchi guruhlari, hududiy Ichki ishlar organlarining tayanch punktlari, mahalliy hokimiyat, aholi gavjum maskanlar – bozorlar, ta’lim va tibbiyot muassasalari, korxona- tashkilotlar, ko‘cha-ko‘ylarda O‘zbekiston Respublikasi IIV huzuridagi Tergov departamenti tashabbusiga binoan ishlab chiqilgan bukletlarni tarqatib, yurtdoshlarimiz bilan suhbat o‘tkazmoqdalar. Bu esa qaysidir ma’noda fuqarolarning huquqiy ongini o‘sishi hamda kelgusida firibgarlikning qurboniga aylanib qolishlariga qarshi kurashishda xizmat qilayotir.
Izoh (0)