Инновацион ривожланиш вазирлиги Сурхондарё вилоятидаги 20 та мактабга Q-Box қурилмасини ўрнатмоқда. Бу ҳақда «Дарё»га вазирлик матбуот хизмати хабар берди.
Q-Box чекка ҳудудлардаги мактаблар, коллежлар, ОТМлар ва бошқа таълим муассасаларида таълим олаётган ўқувчи ҳамда талабалар учун мўлжалланган таълим дастурлари ва маълумотлар базасини ўз ичига олган улкан контентдир. Унга компьютер, смартфон, планшет, ноутбук орқали Wi-Fi’га улангандек кириб, ўзи истаган ресурслардан фойдаланиш мумкин. Бошқача айтганда, интернетга уланмасдан туриб, айнан ушбу тармоқ бера оладиган маълумотларга эгалик қилиш имкониятини тақдим этади.
Бундан ташқари, Q-Box’да инглиз, рус, француз, немис, корейс, хитой ва бошқа тилларни ўргатувчи замонавий интерактив курслар, таржимонлар, энциклопедиялар ва бошқа керакли ўқув курслари ҳам мавжуд.
Q-Box мактаб ўқувчиларнинг дарслик билан боғлиқ муаммоларини ечишда ҳам ёрдам беради. Чунки унда барча синфларга оид китобларнинг электрон нусхаси бўлади. Интернет Q-Box мосламаси Алишер Навоий номидаги Ўзбекистон миллий кутубхонасидаги мавжуд адабиётларнинг босма шаклидаги барча манбаларини ўзида жамлай олади.
Лойиҳанинг иккинчи босқичи EDUBOOK ускунаси билан мактабларни жиҳозлашдир. Арзон ва болаларнинг илм олиши учун мослаштирилган махсус дастурли EDUBOOK компьютерларида астрономия, геометрия ва чизмачилик, географияга алоқадор 3D чизмалар, махсус лабаратория ишлари ва болалар учун рақамли кодлаш дастурлари ўрнатилган.
Изоҳ (0)