Tojikistonning Hisor shahar sudi militsiya podpolkovnigini ko‘pxotinlikda aybdor, deb topdi va 50 ming somoni yoki 5300 dollar miqdorida jarima to‘lashni yukladi. Bu haqda O‘zA xabar bermoqda.
San’atullo Sa’dulloyevga nisbatan hukm 14-dekabr kuni e’lon qilindi va hozircha qonuniy kuchga kirmadi. Podpolkovnikning o‘zi ham, da’vogar bo‘lmish uning birinchi xotini Malohat Azizova ham sud hukmidan norozi ekanligini aytdi. San’atullo Sa’dulloyevning 18-dekabr kuni aytishicha, hukm yuzasidan yuqori sud instansiyalariga shikoyat qiladi. Shu bilan birga u, haqiqatan ham 2009-yildan 2016-yilga qadar ikkita xotin bilan yashaganligini tan oldi, ammo 2 yil muqaddam norasmiy bo‘lmish ikkinchi xotinini taloq qo‘ygan.
Sa’dulloyevning so‘zlariga qaraganda, u qonunga itoat etmagan davrda Tojikistonda uch marta amnistiya e’lon qilingan, shu sababli javobgarlikdan ozod qilinishi kerak. Agar unga nisbatan amnistiya qo‘llanilmaydigan bo‘lsa, u holda podpolkovnik 50 ming somoni miqdorida jarima to‘laydi va ishlab turgan lavozimidan bo‘shatilishi mumkin. Agar vaziyat shu yo‘nalishda ketadigan bo‘lsa, Sa’dulloyevning aytishicha, o‘zining ikki nafar xotinidan tug‘ilgan olti nafar farzandiga aliment to‘lash imkoniyatidan mahrum bo‘ladi.
“Davlat ayblovchisi va sudya birinchi xotinimga otamga tegishli bo‘lgan uyni berishimni yoki 50 ming somoni miqdorida jarima to‘lashimni xohlashdi. Biroq men, oilamizning bir nechta a’zosi istiqomat qilayotgankasal otamning uyini bera olmayman. Men 25 yildan beri huquq-tartibot idoralarida ishlab kelyapman va 15 yildan beri yer uchun navbatda turibman, o‘zimga tegishli shaxsiy uy yo‘q. Ayni damda jarima to‘lash imkoniyatiga ega emasman, chunki oylik maoshim asosan yo‘l kiraga ketadi, chunki har kuni Hisordan Vaxdatga qatnayman”, – deydi nashr suhbatdoshi.
Militsiya podpolkovnigining tan olishicha, ikkita xotin bilan yashash xato bo‘lgan va bu ishidan pushaymon qilmoqda. “Birinchi xotinim birinchi farzand ko‘rganidan so‘ng boshqa farzand ko‘ra olmasligi, buning uchun meni ayblaganidan so‘ng, men o‘zimga ishonch hosil qilish maqsadida ikkinchi xotinga uylandim. Ikkinchi xotinim bilan muqim turar joyimiz bo‘lmagan. U birinchi erining uyida yashardi”, – deya o‘zining qilmishlariga izoh beradi Sa’dulloyev.
Birinchi va qonuniy xotini bo‘lmish 40 yoshli Malohat Azizova bilan San’atullo Sa’dulloyev 17 yil turmush kechirdi, ularning ikki farzandi bor. Ayol 18-dekabr kuni bayonot berib, eri jarima to‘laganidan keyin javobgarlikdan ozod qilinishi kerak emasligni ta’kidladi. “Men va ikki farzandimga uy olib bersin va farzandlari balog‘at yoshiga yetguniga qadar aliment to‘lasin”, – deydi Azizova.
Uning aytishicha, eri unga taloq bergan bo‘lishiga qaramay hamon rasman er-xotin hisoblanadi. “Ikki nafar o‘quvchi farzandlarim bilan o‘gay onam bilan yashaydigan otamning uyida menga joy yo‘q. Qonun adolatli bo‘lishi kerak, da’vo arizamdan keyin erim atigi jarima to‘lab qutilib ketib, men boshpanasiz qolishim kerak emas. Agar mening muammom hal etilmaydigan bo‘lsa, Prezidentgacha chiqaman”, – deydi suhbatdosh.
Uning aytishicha, eri qonunni buzganidan so‘ng sudga murojaat qilishga qaror qilgan. “Qonunga itoat etish bo‘yicha barchaga namuna bo‘lishi kerak bo‘lgan militsiya xodimining o‘zi qonunni buzayotganini hamma ko‘rib qo‘ysin. Huquq himoyachisi o‘zini shunday tutadigan bo‘lsa, oddiy erkaklardan nimalarni ham kutish mumkin?”, – deydi Malohat Azizova.
Podpolkovnikning ikkinchi xotini – 41 yoshli Gulbahor Valiyeva o‘tgan hafta bayonot berib, olti yil muqaddam Sa’dulloyev bilan nikohdan o‘tganini, ammo birinchi xotinining janjallaridan so‘ng “taloq” olganini ma’lum qildi.
Izoh (0)