Gomel va Brest hududlarida tojik-belarus bog‘larining barpo etilishi masalasi Tojikistonning Minskdagi elchisi Mahmadsharif Haqdodaning Belarus tashqi ishlar vaziri birinchi o‘rinbosari Andrey Yevdochenko bilan uchrashuv chog‘ida muhokama qilingan. Bu haqda ASIA-Plus xabar berdi.
Uchrashuv chog‘ida tomonlar oliy darajadagi tashriflar, savdo-iqtisodiy hamkorlik bo‘yicha Tojikiston-Belarus hukumatlararo komissiyasining 13-yig‘ilishi, Belarusda Tojikiston madaniyat kunlari, shuningdek, 2019-yilda tojikistonlik ishlab chiqaruvchilarning mahsulotlar ko‘rgazmasini tashkil etish masalalariga e’tibor qaratdi.
Joriy yilning may oyida Belarus prezidenti Aleksandr Lukashenko Dushanbega amalga oshirgan rasmiy tashrifi chog‘ida Tojikiston prezidenti Emomali Rahmon bilan tojik ko‘chatlari Belarus tuprog‘ida yaxshigina ildiz otishi mumkinligi haqida gapirgandi.
“Nahotki Gomel va Brest viloyatlarida biz bu ekinlarni yetishtira olmaymiz. Bu navlar bizda ham yaxshi o‘sishiga ishonaman”, — degan Belarus prezidenti.
U Tojikiston prezidenti Emomali Rahmon sharafiga ikkita bog‘ barpo etishni va bu ezgu ish uchun yer ajratilayotganda qizg‘anchiqlik qilmaslikni buyurdi.
Tojikiston rahbari belaruslik mutaxassislar bilan ish tashkil etishda yordam berishga va kerak bo‘lsa ko‘plab ko‘chatlarni tayyorlashga va’da berdi.
Izoh (0)