Тожикистоннинг Ҳисор шаҳар суди милиция подполковнигини кўпхотинликда айбдор, деб топди ва 50 минг сомони ёки 5300 доллар миқдорида жарима тўлашни юклади. Бу ҳақда ЎзА хабар бермоқда.
Санъатулло Саъдуллоевга нисбатан ҳукм 14 декабрь куни эълон қилинди ва ҳозирча қонуний кучга кирмади. Подполковникнинг ўзи ҳам, даъвогар бўлмиш унинг биринчи хотини Малоҳат Азизова ҳам суд ҳукмидан норози эканлигини айтди. Санъатулло Саъдуллоевнинг 18 декабрь куни айтишича, ҳукм юзасидан юқори суд инстанцияларига шикоят қилади. Шу билан бирга у, ҳақиқатан ҳам 2009 йилдан 2016 йилга қадар иккита хотин билан яшаганлигини тан олди, аммо 2 йил муқаддам норасмий бўлмиш иккинчи хотинини талоқ қўйган.
Саъдуллоевнинг сўзларига қараганда, у қонунга итоат этмаган даврда Тожикистонда уч марта амнистия эълон қилинган, шу сабабли жавобгарликдан озод қилиниши керак. Агар унга нисбатан амнистия қўлланилмайдиган бўлса, у ҳолда подполковник 50 минг сомони миқдорида жарима тўлайди ва ишлаб турган лавозимидан бўшатилиши мумкин. Агар вазият шу йўналишда кетадиган бўлса, Саъдуллоевнинг айтишича, ўзининг икки нафар хотинидан туғилган олти нафар фарзандига алимент тўлаш имкониятидан маҳрум бўлади.
«Давлат айбловчиси ва судья биринчи хотинимга отамга тегишли бўлган уйни беришимни ёки 50 минг сомони миқдорида жарима тўлашимни хоҳлашди. Бироқ мен, оиламизнинг бир нечта аъзоси истиқомат қилаётганкасал отамнинг уйини бера олмайман. Мен 25 йилдан бери ҳуқуқ-тартибот идораларида ишлаб келяпман ва 15 йилдан бери ер учун навбатда турибман, ўзимга тегишли шахсий уй йўқ. Айни дамда жарима тўлаш имкониятига эга эмасман, чунки ойлик маошим асосан йўл кирага кетади, чунки ҳар куни Ҳисордан Вахдатга қатнайман», – дейди нашр суҳбатдоши.
Милиция подполковнигининг тан олишича, иккита хотин билан яшаш хато бўлган ва бу ишидан пушаймон қилмоқда. «Биринчи хотиним биринчи фарзанд кўрганидан сўнг бошқа фарзанд кўра олмаслиги, бунинг учун мени айблаганидан сўнг, мен ўзимга ишонч ҳосил қилиш мақсадида иккинчи хотинга уйландим. Иккинчи хотиним билан муқим турар жойимиз бўлмаган. У биринчи эрининг уйида яшарди», – дея ўзининг қилмишларига изоҳ беради Саъдуллоев.
Биринчи ва қонуний хотини бўлмиш 40 ёшли Малоҳат Азизова билан Санъатулло Саъдуллоев 17 йил турмуш кечирди, уларнинг икки фарзанди бор. Аёл 18 декабрь куни баёнот бериб, эри жарима тўлаганидан кейин жавобгарликдан озод қилиниши керак эмаслигни таъкидлади. «Мен ва икки фарзандимга уй олиб берсин ва фарзандлари балоғат ёшига етгунига қадар алимент тўласин», – дейди Азизова.
Унинг айтишича, эри унга талоқ берган бўлишига қарамай ҳамон расман эр-хотин ҳисобланади. «Икки нафар ўқувчи фарзандларим билан ўгай онам билан яшайдиган отамнинг уйида менга жой йўқ. Қонун адолатли бўлиши керак, даъво аризамдан кейин эрим атиги жарима тўлаб қутилиб кетиб, мен бошпанасиз қолишим керак эмас. Агар менинг муаммом ҳал этилмайдиган бўлса, Президентгача чиқаман», – дейди суҳбатдош.
Унинг айтишича, эри қонунни бузганидан сўнг судга мурожаат қилишга қарор қилган. «Қонунга итоат этиш бўйича барчага намуна бўлиши керак бўлган милиция ходимининг ўзи қонунни бузаётганини ҳамма кўриб қўйсин. Ҳуқуқ ҳимоячиси ўзини шундай тутадиган бўлса, оддий эркаклардан нималарни ҳам кутиш мумкин?», – дейди Малоҳат Азизова.
Подполковникнинг иккинчи хотини – 41 ёшли Гулбаҳор Валиева ўтган ҳафта баёнот бериб, олти йил муқаддам Саъдуллоев билан никоҳдан ўтганини, аммо биринчи хотинининг жанжалларидан сўнг «талоқ» олганини маълум қилди.
Изоҳ (0)