Bektemirlik Lola Ro‘zmatova ishga tiklanishida amaliy yordam so‘rab tuman adliya bo‘limiga murojaat qildi, deb xabar beradi Adliya bo‘limi axborot xizmati.
Aniqlanishicha, Bektemir tumani tibbiyot birlashmasi boshlig‘i o‘rinbosari lavozimida ishlagan Lola Ro‘zmatova Sog‘liqni saqlash vazirligida bo‘lib o‘tadigan yig‘ilishga tibbiyot birlashmasi rahbarining o‘rniga Damas rusumli xizmat mashinasida ketayotganida Сobalt rusumli avtomashinasining aybi bilan Yashnobod tumani Mirzo Ulug‘bek va Mahtumquli ko‘chalari kesishgan chorrahasida to‘qnashuv sodir bo‘lgan. Natijada Lola Ro‘zmatova tan jarohati olib, hushsiz ahvolda Travmatologiya va ortopediya ilmiy markaziga olib kelingan.
Mehnat qonunchiligida har bir xodim ish bilan bog‘liq holda sog‘lig‘iga yoki mol-mulkiga yetkazilgan zararning o‘rnini qoplash huquqiga egadir, deyilgan. Shuningdek, davlat mehnat shartnomasini g‘ayriqonuniy ravishda bekor qilishdan himoyalashi kafolatlangan.
Jabrlanuvchi Bektemir TTB jarrohi Sh.Bekov tomonidan ko‘rikdan o‘tkazilib, shifokor tavsiyasi asosida unga mehnatga layoqatsizlik varaqasi ochilgan va tegishli jurnalda qayd etilgan.
Biroq Lola Ro‘zmatovadan mehnatga layoqatsiz bo‘lgan holida u bilan tuzilgan mehnat shartnomasini o‘z xohishi bilan bekor qilish haqida ariza yozib berish talab etilib, 2018-yil 20-may kuni (yakshanba) 4 kun avvalgi kun bilan majburan ariza yozdirilib, 2018-yil 16-maydan u bilan mehnat shartnomasini bekor qilish haqida noqonuniy buyruq chiqarilgan.
Ish beruvchi tomonidan amaldagi qonunda ko‘rsatilgan ikki haftalik ogohlantirish muddatiga amal qilinmagan holda Lola Ro‘zmatova bilan mehnat shartnomasi bekor qilingan.
Mazkur noqonuniy holatni bartaraf etish maqsadida Bektemir tuman adliya bo‘limi tomonidan fuqarolik ishlari bo‘yicha Mirobod tumanlararo sudiga da’vo arizasi kiritildi. Sud qaroriga asosan Toshkent shahar Bektemir tuman tibbiyot birlashmasining yuqorida qayd qilingan mehnat shartnomasini bekor qilish haqidagi buyrug‘i g‘ayriqonuniy deb topilib, Lola Ro‘zmatova yana avvalgi lavozimiga ishga tiklandi.
Javobgar Toshkent shahar Bektemir tumani tibbiyot birlashmasidan Lola Ro‘zmatova foydasiga majburiy progul vaqti uchun 5 956 677,4 so‘m miqdorida ish haqi, Lola Ro‘zmatovaning sog‘lig‘i shikastlanishidan kelib chiqqan qo‘shimcha xarajatlar uchun 15 000 000 so‘m hamda ma’naviy zarar uchun 2 000 000 so‘m — jami 22 956 677,4 so‘m undirilishi to‘g‘risida sud qarori chiqarildi.
Izoh (0)