Бектемир тумани адлия бўлими ноқонуний ишдан бўшатилган ходим ҳуқуқларини ҳимоя қилди

Бектемирлик Лола Рўзматова ишга тикланишида амалий ёрдам сўраб туман адлия бўлимига мурожаат қилди, деб хабар беради Адлия бўлими ахборот хизмати.

Аниқланишича, Бектемир тумани тиббиёт бирлашмаси бошлиғи ўринбосари лавозимида ишлаган Лола Рўзматова Соғлиқни сақлаш вазирлигида бўлиб ўтадиган йиғилишга тиббиёт бирлашмаси раҳбарининг ўрнига Damas русумли хизмат машинасида кетаётганида Cobalt русумли автомашинасининг айби билан Яшнобод тумани Мирзо Улуғбек ва Маҳтумқули кўчалари кесишган чорраҳасида тўқнашув содир бўлган. Натижада Лола Рўзматова тан жароҳати олиб, ҳушсиз аҳволда Травматология ва ортопедия илмий марказига олиб келинган.

Меҳнат қонунчилигида ҳар бир ходим иш билан боғлиқ ҳолда соғлиғига ёки мол-мулкига етказилган зарарнинг ўрнини қоплаш ҳуқуқига эгадир, дейилган. Шунингдек, давлат меҳнат шартномасини ғайриқонуний равишда бекор қилишдан ҳимоялаши кафолатланган.

Жабрланувчи Бектемир ТТБ жарроҳи Ш.Беков томонидан кўрикдан ўтказилиб, шифокор тавсияси асосида унга меҳнатга лаёқатсизлик варақаси очилган ва тегишли журналда қайд этилган.

Бироқ Лола Рўзматовадан меҳнатга лаёқатсиз бўлган ҳолида у билан тузилган меҳнат шартномасини ўз хоҳиши билан бекор қилиш ҳақида ариза ёзиб бериш талаб этилиб, 2018 йил 20 май куни (якшанба) 4 кун аввалги кун билан мажбуран ариза ёздирилиб, 2018 йил 16 майдан у билан меҳнат шартномасини бекор қилиш ҳақида ноқонуний буйруқ чиқарилган.

Иш берувчи томонидан амалдаги қонунда кўрсатилган икки ҳафталик огоҳлантириш муддатига амал қилинмаган ҳолда Лола Рўзматова билан меҳнат шартномаси бекор қилинган.

Мазкур ноқонуний ҳолатни бартараф этиш мақсадида Бектемир туман адлия бўлими томонидан фуқаролик ишлари бўйича Миробод туманлараро судига даъво аризаси киритилди. Суд қарорига асосан Тошкент шаҳар Бектемир туман тиббиёт бирлашмасининг юқорида қайд қилинган меҳнат шартномасини бекор қилиш ҳақидаги буйруғи ғайриқонуний деб топилиб, Лола Рўзматова яна аввалги лавозимига ишга тикланди.

Жавобгар Тошкент шаҳар Бектемир тумани тиббиёт бирлашмасидан Лола Рўзматова фойдасига мажбурий прогул вақти учун 5 956 677,4 сўм миқдорида иш ҳақи, Лола Рўзматованинг соғлиғи шикастланишидан келиб чиққан қўшимча харажатлар учун 15 000 000 сўм ҳамда маънавий зарар учун 2 000 000 сўм — жами 22 956 677,4 сўм ундирилиши тўғрисида суд қарори чиқарилди.