Шавкат Мирзиёев Қарши шаҳрида барпо этилган «Ватанпарварлар» боғини бориб кўрди. Бу ҳақда Президент матбуот хизмати хабар бермоқда.
Бу мажмуа давлат раҳбарининг вилоятга аввалги ташрифида берган кўрсатмасига мувофиқ ватанпарварлик руҳида реконструкция қилинган.
Қарийб 7 гектар ҳудуд ободонлаштириб, музей ва блендаж қурилган. Иккинчи жаҳон урушида мардонавор жанг қилган ватандошларимиз хотираси жонлантирилган. Музей атрофида тарихий ҳарбий техникалар жойлаштирилган.
Боғ марказида Ўзбекистон миллий харитасининг улкан макети жойлаштирилган. Унда ҳар бир вилоятнинг буюк сиймолари, қадимий обидалари, сервиқор тоғлари, ҳудудидан оқиб ўтувчи дарёлари, бепоён кенгликларигача акс эттирилган.
Боғдаги сунъий кўл, амфитеатр, ўқ отиш ва қояга чиқиш жойлари ёшларнинг вақтини мазмунли ўтказиш, саломатлигини мустаҳкамлашга ёрдам беради.
Президент боғдаги шароитларни кўздан кечирди, таълим муассасаларидаги «Жасорат» гуруҳлари аъзолари билан суҳбатлашди.
— Бундай масканлар ёшларга халқ тарихи, маънавияти ва маданияти ҳақида яққол таассурот беради. Энди бундан самарали фойдаланиш, бу ерга ёшларни кўпроқ олиб келиб, очиқ дарслар ўтказиш керак, — деди Шавкат Мирзиёев.
Ўзбекистоннинг Иккинчи жаҳон урушидаги ғалабага қўшган ҳиссасини ёшларга етказиш, тинчлик-осойишталик учун катта хизматлар қилган ватандошлар ҳақида сўзлаб бериш зарурлиги таъкидланди.
Изоҳ (0)