2017-yil 7-dekabr kuni Prezident Shavkat Mirziyoyev mamlakat Konstitutsiyasi qabul qilinganining 26 yilligi bayrami munosabati afv e’lon qilgandi. Unga ko‘ra, Farg‘ona viloyatida 12 nafar mahkum jazoni ijro etish muassasalaridan ozod qilindi. Bu haqda Farg‘ona viloyati prokuraturasi “Daryo”ga xabar berdi.
Jazodan ozod qilingan shaxslarni ijtimoiy himoya qilish va ularni hayotga moslashtirish maqsadida bandligini ta’minlash, o‘z vaqtida tibbiy ko‘rikdan o‘tkazilishi, bir martalik beriladigan moddiy yordam pullarini o‘z vaqtida olishlari prokuratura organlari tomonidan nazoratga olingan.
Bundan tashqari, jazodan ozod qilingan shaxslarni kelgusida huquqbuzarlik va jinoyat sodir etmasligini oldini olish maqsadida keng jamoatchilik vakillari hamda huquq tartibot xodimlari tomonidan profilaktik tadbirlar muntazam o‘tkazib borilishi yo‘lga qo‘yildi.
Ma’lumot uchun, afv etish O‘zbekiston Respublikasi Prezidenti tomonidan berilib, sudlari tomonidan hukm qilingan O‘zbekiston fuqarolariga, chet el fuqarolariga va fuqaroligi bo‘lmagan shaxslarga nisbatan qo‘llaniladi.
Eslatib o‘tamiz, Konstitutsiya bayrami arafidagi afv borasidagi farmon 136 kishiga daxl qilib, shundan 98 kishi qamoqdan ozod etilishi belgilandi. Qayd etilishicha, afv etilganlarning 62 nafari taqiqlangan tashkilotlar vakillaridir.
Izoh (0)