Oliy Majlis Senatining o‘n yettinchi yalpi majlisida senatorlar O‘zbekiston Respublikasi tashqi ishlar vazirining vazirlik zimmasiga yuklangan vazifalarni bajarish bo‘yicha faoliyati to‘g‘risidagi axboroti haqidagi hisobotni tingladi. Bu haqda “Daryo” muxbiri Sevara Nishonova xabar berdi.
Bu borada muayyan ishlar amalga oshirilgani ta’kidlandi. Jumladan, O‘zbekiston Respublikasining Tashqi ishlar vazirligi va xorijdagi muassasalari tomonidan O‘zbekiston Respublikasi vazirliklari, idoralari, hokimliklari va kompaniyalari hamda xorijiy hamkorlar o‘rtasida savdo-iqtisodiy hamkorlik sohasida umumiy summasi 6 milliard dollarlik 80 dan ortiq hujjat imzolashda ko‘mak berildi.
Xorijiy investitsiyalarni jalb qilishga qaratilgan izchil ishlar amalga oshirilmoqda. Jumladan, 2018 yil noyabr oyining oxiriga kelib, O‘zbekistonning diplomatik missiyalari tomonidan umumiy summasi 21 milliard dollarlik 372 ta loyiha ishlab chiqilmoqda.
Xorijiy muassasalar tomonidan O‘zbekistonnnig turistik salohiyatiga bag‘ishlangan qariyb 250 ta taqdimot o‘tkazildi. Diplomatik missiyalar 50 dan ortiq turizm ko‘rgazmasi va yarmarkalarda ishtirok etdi.
Shu bilan bilan birga, vazirlik faoliyatini o‘rganish va tahlil qilish katta foydalanilmagan salohiyat hamda hal etilmagan qator muammo va kamchiliklar borligini ko‘rsatdi.
Jumladan, idoralararo hamkorlikni ta’minlash muammosi hanuzgacha hal etilmagan, ishlab chiqilgan loyihalarni amalga oshirish jarayoni yoki tashriflar yakunlari to‘g‘risida axborot olish imkonini beradigan O‘zbekiston Respublikasi vazirlik va idoralari bilan aniq o‘zaro aloqa mexanizmi mavjud emas, bu esa ikki tomonlama hamkorlikning chinakam holatini bilishni, uni yanada rivojlantirish bo‘yicha dolzarb tavsiyalar tayyorlashni cheklaydi.
Mamlakat tovarlari eksportini rivojlantirish, investitsiyalar va turistlarni jalb qilish masalari bo‘yicha vazirlik va idoralar bilan hamkorlik qilishda Tashqi ishlar vazirligi va diplomatik vakolatxonalar xorijiy muassasalarning takliflari sohaga ixtisoslashgan idoralar va viloyatlar hokimliklari tomonidan uzoq ko‘rib chiqilishi bilan bog‘liq muammoga duch kelmoqda. Bu bir qator muhim ikki tomonlama tadbirlarning majburan bekor qilinishiga yoki ko‘chirilishiga sabab bo‘lmoqda.
Hokimliklar faoliyatida idoralararo muvofiqlashtirish yetishmasligi, xorijiy hamkorlar bilan hamkorlik bo‘yicha aniq rejalar ishlab chiqishga rasmiyatchilik yuzasidan munosabatda bo‘lish saqlanib qolmoqda. Tashrifgacha investorlar bilan masofaviy ishlar olib borilmayapti, hamkorlik shartlari, shartnomalar summalari kelishib olinmayapti. Oxir-oqibat uchrashuvlar aniq shartnomalar va maqsadli bitimlar tuzish o‘rniga hamkorlik to‘g‘risida oddiy memorandumlar imzolash bilan yakunlanmoqda.
Xorijiy muassasalar ko‘p sonli hisobotlar tayyorlash bilan haddan ortiq ko‘p shug‘ullanishi ishlar samaradorligiga salbiy ta’sir ko‘rsatmoqda. Bunday holat, ayniqsa xodimlar shtatining cheklanganligi hisobga olinsa, xorijiy muassasalarga diqqat-e’tiborni aniq natijaga qaratish imkonini bermayapti.
Bugungi kunda O‘zbekiston investitsiya salohiyatining chet tillarida sifatli tayyorlangan mazmunan boy materiallar hali ham yetishmasligi kuzatilmoqda.
Senatorlar Tashqi ishlar vazirligi faoliyati samaradorligini yanada oshirish yuzasidan tavsiyalar bildirdi.
Jumladan, 2019-yilgi ish rejalarini tuzishda O‘zbekiston Respublikasining xorijdagi muassasalari eksportning importga nisbatan jadal sur’atlarda o‘sishini, shuningdek turistlar oqimi, ayniqsa uzoq xorij mamlakatlaridan turistlar oqimi oshishini ta’minlashi zarur.
Shuningdek Qoraqalpog‘iston Respublikasi va viloyatlarning investitsiya va turistik salohiyatini tanitish uchun O‘zbekistonda akkreditatsiyadan o‘tgan diplomatik vakolatxonalarning yangi xodimlari uchun respublika hududlariga guruh bo‘lib muntazam tashriflar tashkil etishni amaliyotga joriy etish zarurligi qayd etildi.
Muhokama yakunlari bo‘yicha O‘zbekiston Respublikasi Oliy Majlisi Senatining tegishli qarori qabul qilindi.
Izoh (0)