Сенаторлар Ташқи ишлар вазирлиги фаолиятидаги муаммо ва камчиликларни муҳокама қилди

Олий Мажлис Сенатининг ўн еттинчи ялпи мажлисида сенаторлар Ўзбекистон Республикаси ташқи ишлар вазирининг вазирлик зиммасига юкланган вазифаларни бажариш бўйича фаолияти тўғрисидаги ахбороти ҳақидаги ҳисоботни тинглади. Бу ҳақда «Дарё» мухбири Севара Нишонова хабар берди.

Бу борада муайян ишлар амалга оширилгани таъкидланди. Жумладан, Ўзбекистон Республикасининг Ташқи ишлар вазирлиги ва хориждаги муассасалари томонидан Ўзбекистон Республикаси вазирликлари, идоралари, ҳокимликлари ва компаниялари ҳамда хорижий ҳамкорлар ўртасида савдо-иқтисодий ҳамкорлик соҳасида умумий суммаси 6 миллиард долларлик 80 дан ортиқ ҳужжат имзолашда кўмак берилди.

Хорижий инвестицияларни жалб қилишга қаратилган изчил ишлар амалга оширилмоқда. Жумладан, 2018 йил ноябрь ойининг охирига келиб, Ўзбекистоннинг дипломатик миссиялари томонидан умумий суммаси 21 миллиард долларлик 372 та лойиҳа ишлаб чиқилмоқда.

Хорижий муассасалар томонидан Ўзбекистоннниг туристик салоҳиятига бағишланган қарийб 250 та тақдимот ўтказилди. Дипломатик миссиялар 50 дан ортиқ туризм кўргазмаси ва ярмаркаларда иштирок этди.

Шу билан билан бирга, вазирлик фаолиятини ўрганиш ва таҳлил қилиш катта фойдаланилмаган салоҳият ҳамда ҳал этилмаган қатор муаммо ва камчиликлар борлигини кўрсатди.

Жумладан, идоралараро ҳамкорликни таъминлаш муаммоси ҳанузгача ҳал этилмаган, ишлаб чиқилган лойиҳаларни амалга ошириш жараёни ёки ташрифлар якунлари тўғрисида ахборот олиш имконини берадиган Ўзбекистон Республикаси вазирлик ва идоралари билан аниқ ўзаро алоқа механизми мавжуд эмас, бу эса икки томонлама ҳамкорликнинг чинакам ҳолатини билишни, уни янада ривожлантириш бўйича долзарб тавсиялар тайёрлашни чеклайди.

Мамлакат товарлари экспортини ривожлантириш, инвестициялар ва туристларни жалб қилиш масалари бўйича вазирлик ва идоралар билан ҳамкорлик қилишда Ташқи ишлар вазирлиги ва дипломатик ваколатхоналар хорижий муассасаларнинг таклифлари соҳага ихтисослашган идоралар ва вилоятлар ҳокимликлари томонидан узоқ кўриб чиқилиши билан боғлиқ муаммога дуч келмоқда. Бу бир қатор муҳим икки томонлама тадбирларнинг мажбуран бекор қилинишига ёки кўчирилишига сабаб бўлмоқда.

Ҳокимликлар фаолиятида идоралараро мувофиқлаштириш етишмаслиги, хорижий ҳамкорлар билан ҳамкорлик бўйича аниқ режалар ишлаб чиқишга расмиятчилик юзасидан муносабатда бўлиш сақланиб қолмоқда. Ташрифгача инвесторлар билан масофавий ишлар олиб борилмаяпти, ҳамкорлик шартлари, шартномалар суммалари келишиб олинмаяпти. Охир-оқибат учрашувлар аниқ шартномалар ва мақсадли битимлар тузиш ўрнига ҳамкорлик тўғрисида оддий меморандумлар имзолаш билан якунланмоқда.

Хорижий муассасалар кўп сонли ҳисоботлар тайёрлаш билан ҳаддан ортиқ кўп шуғулланиши ишлар самарадорлигига салбий таъсир кўрсатмоқда. Бундай ҳолат, айниқса ходимлар штатининг чекланганлиги ҳисобга олинса, хорижий муассасаларга диққат-эътиборни аниқ натижага қаратиш имконини бермаяпти.

Бугунги кунда Ўзбекистон инвестиция салоҳиятининг чет тилларида сифатли тайёрланган мазмунан бой материаллар ҳали ҳам етишмаслиги кузатилмоқда.

Сенаторлар Ташқи ишлар вазирлиги фаолияти самарадорлигини янада ошириш юзасидан тавсиялар билдирди.

Жумладан, 2019 йилги иш режаларини тузишда Ўзбекистон Республикасининг хориждаги муассасалари экспортнинг импортга нисбатан жадал суръатларда ўсишини, шунингдек туристлар оқими, айниқса узоқ хориж мамлакатларидан туристлар оқими ошишини таъминлаши зарур.

Шунингдек Қорақалпоғистон Республикаси ва вилоятларнинг инвестиция ва туристик салоҳиятини танитиш учун Ўзбекистонда аккредитациядан ўтган дипломатик ваколатхоналарнинг янги ходимлари учун республика ҳудудларига гуруҳ бўлиб мунтазам ташрифлар ташкил этишни амалиётга жорий этиш зарурлиги қайд этилди.

Муҳокама якунлари бўйича Ўзбекистон Республикаси Олий Мажлиси Сенатининг тегишли қарори қабул қилинди.