O‘zbekiston Oliy Majlis Senatining o‘n yettinchi yalpi majlisining ikkinchi ish kunida senatorlar Farg‘ona viloyati hokimining hududlarni rivojlantirish hamda xalq deputatlari mahalliy Kengashlari faoliyati haqidagi hisobotini tingladi, deb xabar berdi “Daryo” muxbiri Sevara Nishonova.
Hokim o‘z nutqida Farg‘ona viloyatida hududlarni rivojlantirish hamda xalq deputatlari mahalliy Kengashlari faoliyati samaradorligini oshirishga salbiy ta’sir ko‘rsatayotgan ko‘plab muammo va kamchiliklar haqida to‘xtalib o‘tdi.
“Ayrim vazirlik va markaziy idoralarning viloyatdagi mavjud muammolar yechimiga kompleks yondashmayotgani, ularni hal etish bo‘yicha mahalliy hokimliklarning tashabbuslari, takliflari, aholining xohish-istaklari yetarli darajada inobatga olinmayotgani oqibatida qator masalalar dolzarbligicha qolmoqda”, — deydi Farg‘ona viloyati hokimi.
Farg‘onada ko‘mir konlarini izlab topish va ulardan samarali foydalanish bo‘yicha Hukumat darajasida belgilangan topshiriqlar ijrosiga Davlat geologiya va mineral resurslar qo‘mitasi tomonidan e’tibor berilmagani oqibatida mazkur vazifani ro‘yobga chiqarishda viloyat tashkilotlari jiddiy qiyinchiliklarga duch kelmoqda.
O‘zbekiston Respublikasi Prezidentining tashrifi davomida berilgan topshiriqlar ijrosiga ham ayrim vazirlik va idoralar tomonidan jiddiy e’tibor qaratilmagan.
Xususan, joriy yil 12—13-iyun kunlaridagi tashrif davomida Suv xo‘jaligi vazirligi, Moliya vazirligi, Investitsiyalar bo‘yicha davlat qo‘mitasi zimmasiga Farg‘ona tumanidagi Oqbilol massividagi 3450 gektar ekin yerlarining suv ta’minotini yaxshilash maqsadida qurilishi tugallanmay qolgan “Fayzobod-2” nasos stansiyasi qurilishini yakunlash masalasini bir oy muddatda o‘rganib chiqish, tegishli xulosalarni Vazirlar Mahakamasiga kiritish vazifasi belgilangan.
Biroq shu kunga qadar mazkur masala yuzasidan Vazirlar Mahkamasining tegishli hujjati qabul qilinmagan.
“O‘zbekenergo” aksiyadorlik jamiyati tomonidan viloyat iste’molchilari, xususan, ijtimoiy obyektlar, aholi va tadbirkorlik subyektlarini elektr energiyasi bilan uzluksiz ta’minlash bo‘yicha samarali choralar o‘z vaqtida yetarli darajada ko‘rilmagan.
Bevosita o‘rganishlar shuni ko‘rsatdiki, viloyat iste’molchilarini elektr energiyasi bilan ta’minlovchi elektr tarmog‘ining 3,7 ming km qismi yoki 15 foizi foydalanish uchun qisman yaroqsiz holatga kelgan, 8,5 ming km dan yoki 35 foizdan ko‘prog‘i eskirgan.
Viloyatdagi elektr energiyasi uzatishga mo‘ljallangan simyog‘ochlarning aksariyati, transformator punktlarining 2980 tasi yoki 36 foizi yaroqsiz holga kelib qolgan yoxud eskirgan.
Oqibatda elektr energiyasidagi muntazam uzilishlar aholi va tadbirkorlik subyektlarining haqli e’tirozlariga sabab bo‘lmoqda. Elektr energiyasi ba’zi mahallalarga bir soat yetkazilsa, ikki soat to‘xtatilmoqda.
“O‘ztransgaz” aksiyadorlik jamiyati tomonidan zarur choralar o‘z vaqtida ko‘rilmagani oqibatida viloyat aholisini hamda xo‘jalik yurituvchi subyektlarni gaz bilan ta’minlash borasidagi ko‘plab muammo va kamchiliklar saqlanib qolmoqda.
Viloyatdagi iste’molchilarning 35 foizi tabiiy gaz bilan ta’minlanmagan.
Bundan tashqari, har bir xonadonga oyiga 20 kg o‘rniga bor-yo‘g‘i 9,4 kg suyultirilgan gaz ajratilmoqda.
Viloyatga ajratilgan suyultirilgan gazni to‘liq tashib kelish uchun qo‘shimcha ravishda 40 ta vagon-sisternaga ehtiyoj mavjud.
Viloyat aholisi va tadbirkorlik subyektlarini ichimlik suvi bilan ta’minlash borasidagi ayrim muammolar ham dolzarbligicha qolmoqda.
Moliya vazirligi hamda boshqa mas’ul tuzilmalar tomonidan aholi va ijtimoiy muassasalarni ichimlik suvi bilan mavjud ehtiyojni inobatga olgan holda zarur hajmda ta’minlash bo‘yicha ko‘rilayotgan choralar yetarli emas.
Bugungi kunda viloyatda mavjud bo‘lgan 6216 km ichimlik suvi tarmoqlaridan 2732 km qismi yoki 43 foizi ta’mirtalab holatga tushib qolgan.
Viloyatdagi 2604 dona suv inshootlaridan 548 tasi yoki 21 foizi ularga belgilangan muddatlarda texnik xizmat ko‘rsatilmaganligi va boshqa sabablarga ko‘ra foydalanish uchun yaroqsiz holga kelgan.
Buning oqibatida minglab aholi markazlashgan ichimlik suvi bilan ta’minlanmasdan qolmoqda.
Viloyatda yashovchi 3 million 600 ming nafar aholining 756 ming nafari yoki 21 foizi ichimlik suvini tashib kelib ichishga majbur bo‘lmoqda.
Viloyatda bolalarni maktabgacha ta’limga qamrab olish holati qoniqarli emas.
Viloyat hududidagi 3-7 yoshdagi 270,0 mingga yaqin boladan 116,0 mingga yaqini yoki 43,0 foizi maktabgacha ta’limga qamrab olingan. 775 ta davlat maktabgacha ta’lim muassasasining 167 tasi yoki 22 foizi markazlashgan ichimlik suvi tizimiga ulanmagan.
Bugungi kunda viloyatdagi umumta’lim maktablarining 120 tasi yoki 23 foizi rekonstruksiya va kapital ta’mirga muhtoj. Mazkur muassasalarning 323 tasi yoki 61,2 foizi markazlashgan ichimlik suvi bilan, 497 tasi yoki 94 foizi markazlashgan issiqlik energiyasi bilan ta’minlanmagan.
Xalq ta’limi vazirligi tomonidan yetarli e’tibor va tashabbus ko‘rsatilmayotgani oqibatida umumta’lim maktablarining moddiy-texnik bazasi bilan bog‘liq kamchiliklar uzoq yillardan buyon saqlanib qolmoqda.
Xususan, maktablarda 1144 ta parta yetishmaydi, 96 ta fizika, 146 ta kimyo, 146 ta biologiya o‘quv-laboratoriya xonalari umuman jihozlanmagan, o‘quvchilar bilimini baholash natijalari qayd etiladigan sinf jurnallari shu kunga qadar ta’lim muassasalariga yetkazib berilmagan.
Viloyatdagi umumta’lim maktablarida 46 nafar o‘qituvchi yetishmaydi,2368 dan ziyod pedagog esa o‘rta-maxsus ma’lumotga ega, xolos.
Sog‘liqni saqlash vazirligi tomonidan sog‘liqni saqlash muassasalarining samarali faoliyat olib borishi uchun, xususan, ularning moddiy-texnika bazasini yaxshilash bo‘yicha kompleks chora-tadbirlar yetarli darajada ko‘rilmagan.
Viloyat sog‘liqni saqlash tizimidagi 315 ta muassasaning 212 tasi mukammal ta’mirga muhtoj.
Viloyat ko‘p tarmoqli tibbiyot markazining aholiga ixtisoslashtirilgan tibbiy yordam ko‘rsatuvchi bo‘limlarining aksariyati moslashtirilgan binolarda joylashgan.
Tibbiyot muassasalarining 164 tasi yoki 69 foizi ichimlik suvi va gaz bilan uzluksiz ta’minlanmagan.
Viloyatdagi tibbiyot muassasalarida esa 243 nafar shifokor va boshqa mutaxassislar yetishmaydi.
Tizimdagi davolash-profilaktika muassasalarida hayot uchun eng muhim va kerakli bo‘lgan 23 turdagi 97 dona 912,5 milliard so‘mlik tibbiy asbob-uskunalarga ehtiyoj mavjud.
Viloyat hokimligi va mahalliy tadbirkorlarning sa’y-harakati bilan xususiy tibbiy xizmat rivojlantirilmoqda. Biroq,Sog‘liqni saqlash vazirligining ko‘rsatmasi asosida davlat tibbiyot muassasalaridagi o‘rinlar (“koykalar”) soni asossiz ravishda qisqartirilmoqda.
Izoh (0)