Rossiyalik artist, hajviy yozuvchi Lion Izmaylov O‘zbekistonda xizmat ko‘rsatgan artist Obid Asomovning vafoti munosabati bilan qiziqchini xotirlab, u bilan Toshkentda ko‘rishgani va unga o‘z vatanida qanday munosabatda bo‘lishgani haqida gapirdi, deb yozadi Sputnik.
Izmaylovning so‘zlariga ko‘ra, Obid Asomovning O‘zbekistondagi mashhurligi juda yuqori darajada bo‘lgan.
“Biz Toshkentga ko‘p bora kelganmiz, 2000-yillar boshida uch kishi — men, Nikolay Lukinskiy va Regina Dubovitskaya u yerda mehmon bo‘lganmiz… Asomov bizni kutib olib, hamma joyda olib yurgan va shaharni aylantirgan edi. Esimda, bozorga kirganimizda atrofimizda odamlar to‘plana boshladi — dastlab 50 kishi, keyin yuz, so‘ng ikki yuz. Asomovni ko‘rish uchun barcha rastalardan kela boshlashdi. Men uning qo‘lini ushlab olib, qochib qolishimizni, aks holda bizni o‘tkazib yubormasliklarini aytgandim”, — deya esladi Izmaylov.
Qiziqchining qo‘shimcha qilishicha, u Asomovni o‘z dasturiga taklif qilganida, uning chiqishi omma orasida katta muvaffaqiyat qozongan.
Eslatib o‘tamiz, O‘zbekistonda xizmat ko‘rsatgan artist, taniqli so‘z ustasi Obid Asomov 14-dekabr kuni Toshkentdagi 1-shahar klinik shifoxonasida vafot etdi.
Izoh (0)