Ijtimoiy tarmoqlarda O‘zbekiston xalq artisti Yulduz Usmonovaning Checheniston xalq artisti San Jayga qilgan videomurojaati tarqalgan edi. Yulduz Usmonova videomurojaatda uzoq yillik ijodi mobaynida qilgan barcha ijod na’munalarining g‘oyasi aynan o‘ziga tegishli ekanligi, shu bilan birgalikda “Men sen bilan qirolichaman” deb nomlangan taronasining g‘oyasi ham San Jayga emas, balki o‘ziga tegishliligi borasida gapirib o‘tgan.
Bundan tashqari Yulduz Usmonova “Bu soqolli bolani tanimadim, lekin soqolini sal yig‘ishtirib, o‘zini o‘nglab olib yursa yaxshi bo‘lardi, “O‘zbekkonsert” qayoqqa qaramoqda bilmadim, san’atkorlar soqol qo‘yishi noto‘g‘ri. San san’atkor bo‘lsang, juda ham g‘oyaga boy yigit bo‘lsang nimaga bunaqa qilib yuribsan. Ikkinchidan gapingni o‘ylab gapir” mazmunidagi fikrlarni ham aytib o‘tgan.
Checheniston xalq artisti San Jay jurnalist Feruz Muhammadga bergan intervyusida barchasiga oydinlik kiritib, quyidagi fikrlarni bildirdi.
O‘zi Yulduz Usmonova to‘g‘risida hech qayerda gapirgim kelmagan edi. E’tibor bergan bo‘lsangiz intervyuda ‘Qirolichaman’ qo‘shig‘i meniki, deb aytmaganman, aksincha ‘Ya s taboyu koroleva’ degan qo‘shiq haqida gapirganman. ‘Qirolichaman’ degan qo‘shiqqa meni hech qanaqa aloqam yo‘q. Yulduz opa siz iloji bo‘lsa ‘Sayyod’ga bergan intervyuni e’tibor berib ko‘sangiz, menimcha aytgan gaplaringizdan qaytishingiz mumkin. Bu mavzuni umuman ko‘tarmoqchi ham emasdim, savol berilgani uchun javob berdim.Voqea quyidagicha bo‘lgan. Men 2015-yil Pavel Uporov ismli bastakor bilan birga Yulduz Usmonovaga ‘Ya s taboyu koroleva’ degan qo‘shiqni yozib berganmiz. Bu qo‘shiqni Yulduz opa aytganlar, studiyada yozganlar, qo‘shiq chiqqan. ‘Ya s taboyu koroleva’ qo‘shig‘i yozildi ammo chiqmadi, balki Yulduz opaga yoqmagandir, balki boshqa sababi bordir, balki ‘keyinroq chiqaraman’, degandirlar. Lekin bir oy, ikki oy vaqt o‘tib ‘Men sen bilan qirolichaman’ degan qo‘shiqni chiqardilar. ‘Ya s taboyu koroleva’ so‘zini o‘zbekchaga tarjima qilsangiz ham ‘Men sen bilan qirolichaman’, bo‘ladi. Demak, men aytgan gap yolg‘on emas. ‘Ya s taboyu koroleva’ qo‘shig‘ining muallifi menman. ‘Qirolichaman’ qo‘shig‘ini Yulduz opaning o‘zlari yozganlar, musiqasi ham, so‘zlari ham ularga tegishli, Qirolichaman qo‘shig‘iga hech qanday aloqam yo‘q, faqat ‘Ya s taboyu koroleva’ qo‘shig‘ining muallifi menman.
Juda ko‘pchilik Yulduz Usmonovaga javob qaytarasizmi, siz haqingizda ko‘p gapirib yuboribdilar, deya ko‘plar tomonidan menga savol berishmoqda. Yulduz Ibragimovna men sizni juda ham yaxshi ko‘raman, sizni, san’atingizni juda hurmat qilaman. Sizdek san’atkorlar O‘zbekistonda sanoqlidir. Opajon siz to‘g‘ringizda yomon gapiraman degan xayolimda fikr bo‘lmagan, xudo xohlasa havolar isib ketib, o‘rtamizda bu o‘tgan gap-so‘zlar unutilib, yaxshi bo‘lib ketsa siz bilan chiroyli-chiroyli duetlar qilib, xalqqa sovg‘a qilish niyatim ham bor edi.
Ko‘plar Yulduz Usmonovani yomonlab, qo‘shiq maniki deb piar qilmoqchi bo‘ldi deyishmoqda. Lekin bu narsalar meni xayolimda ham yo‘q. Bu savol menga berildi, bu narsani o‘zim ko‘targanim yo‘q. Men esa o‘zbekcha qilib aytganda dangal qilib berilgan savolga hech narsani yashirmasdan javob berdim. Yulduz opa o‘sha intervuga yaxshilab, e’tibor berib quloq solsangiz u yerda ‘Ya s taboyu koroleva’ iborasi meniki deb gapirilgan, ‘Qirolichaman’ degan qo‘shiq haqida gapirmaganman.
Yulduz opani nazariga tushganimning o‘zi ham katta yutuq. Lekin piar qilish xayolimga ham kelmagan. Ko‘p ortiqcha gaplarni ham gapirdilar, ‘etagimga osilayotgan’, ‘ahmoq’, ‘bakteriya’ degan so‘zlarni ham aytibdilar. Lekin men Yulduz opadan eshitgan so‘zlarimga umuman xafa bo‘lmayman. Chunki Yulduz opa shunaqa insonlar, yonib ketadilar, balki aytgan gaplaridan keyin, ‘shunaqa gapirib qo‘ydim’, deb pushaymon ham yeyayotgandirlar. Lekin meni ko‘nglimni og‘ritganiz yo‘q. Sizning e’tiboringizga tushib, bizning piar kompaniyamiz yanada ko‘tarilib ketdi, bu uchun sizga kattakon rahmat.
Iloji bo‘lsa birga ijod qilsak yomon bo‘lmas edi. Sizni yoshligimdan yaxshi ko‘rib tinglaganman, hurmat qilganman. Hech qachon ‘siz haqingizda yomon gapiraman, siz orqali piar qilib, ko‘tarilaman’, degan niyatda bo‘lmaganman, bunga Alloh guvoh. Har doim hamma narsani yaxshilik bilan tugashini xohlayman.
Bastakor Pavel Uporov mening ishtirokimsiz bu qo‘shiqni Yulduz opaga sotgan. Men bu qo‘shiqdan o‘zimni gonorarimni olganman. Nima bo‘lganda ham Yulduz opa men sizdan xafa emasman, agar men sizni dilingizni og‘ritgan bo‘lsam ming bor uzr. Lekin siz ham ozgina tilga erk bermasdan, chiroyli gapirsangiz menimcha muxlislaringiz bundan ham ko‘payib, bundan ham hurmatingiz baland bo‘ladi.
San Jay, Checheniston xalq artisti
Izoh (0)