9-dekabrning asosiy yangiliklari — “Daryo” dayjestida.
“Dunyo go‘zali — 2018” nomiga bu yil Meksika vakili Vanessa Ponse de Leon sazovor bo‘ldi. “Dunyo go‘zali — 2018” tanlovi g‘olibi pul mukofotini qo‘lga kiritadi, ammo shartnoma shartlariga ko‘ra uni xayriyaga yo‘naltirishi lozim. G‘olibga esa toj, Londonda yashash uchun bir yillik uy to‘lovi hamda keyingi tanlovgacha xayriya aksiyalarida ishtirok etish majburiyati nasib qiladi.
***
Rossiya Ijtimoiy va siyosiy tadqiqotlar markazi direktori Georgiy Fyodorov O‘zbekiston va Ukraina o‘rtasidagi savdo urushining oqibatlari haqida gapirdi. “Ukraina tomonidan qabul qilinayotgan O‘zbekiston bilan ayrim savdo munosabatlarini to‘xtatib qo‘yish to‘g‘risidagi qaror uning g‘alabasidan ko‘proq yo‘qotishiga olib keladi. Ukrainadan O‘zbekistonga mahsulotlar eksporti qiymati O‘zbekistondan importning uchdan ortiq baravar ortiqligini inobatga olsak, yetkazib berishdagi uzilishlar jiddiy yo‘qotishlarga olib keladi”, — deb hisoblaydi Fyodorov.
***
O‘zbekistonda suv omborlari tarmog‘ini kengaytirish hisobidan lalmi yerlarni o‘zlashtirish masalasiga alohida e’tibor qaratiladi. Buning uchun Toshkent viloyatida jami 45 million kub metr suv yig‘iladigan “Parkentsoy”, “Qizilsoy”, “Toshtepa”, Jizzax viloyatining Forish tumanida “Karaman”, Qashqadaryo viloyatida “Guldara”, “Ayaqchisoy”, Samarqand viloyatida “Bulung‘ur” suv omborlari barpo etiladi.
***
O‘zbekiston bosh vazirining birinchi o‘rinbosari Achilboy Ramatov va Qozog‘iston bosh vazirining birinchi o‘rinbosari Asqar Mamin o‘rtasida uchrashuv bo‘lib o‘tdi. Tomonlar o‘tkazish punktlarini modernizatsiya qilish va qayta ta’mirdan chiqarish, shuningdek, o‘zbek-qozoq chegarasida transport to‘planishi muammosini muhokama qildi.
***
Buyuk Britaniya bosh vaziri Tereza Mey mamlakatda huquqlari chegaralanishi rejalashtirilayotgan olti nafar rossiyalik biznesmenlarning ro‘yxatini tasdiqladi. Bular — USM Holdings kompaniyalar guruhi asoschisi Alisher Usmonov, “Chelsi” futbol klubi egasi Roman Abramovich, “Rusala” sobiq prezidenti Oleg Deripaska, aka-uka Arkadiy va Boris Rotenberglar hamda “Rosneft” rahbari Igor Sechin.
Izoh (0)