Turkiyaning O‘zbekistondagi elchixonasiga 2019—2020-yillarda NATO va O‘zbekiston o‘rtasidagi aloqalarni muvofiqlashtirish vakolati berildi. “Bu vakolat 2017—2018-yillarda O‘zbekistonning NATO bilan aloqalarini muvofiqlashtirgan Latviya elchixonasidan Turkiya elchixonasiga o‘tkazildi”, – deb xabar beradi Turon24 Latviya elchixonasiga tayanib.
Endilikda Turkiya elchixonasi NATOga a’zo davlat sifatida O‘zbekistonga ittifoqning siyosati haqida xabar beradi va aloqalarni muvofiqlashtiradi.
6-dekabr kuni Toshkentda o‘tkazilgan marosimda Latviya elchisi Mixail Popkovs elchixona O‘zbekiston bilan NATO o‘rtasidagi aloqalarni mustahkamlashda bir qator ishlarni amalga oshirganini ta’kidlagan. Diplomatning so‘zlariga ko‘ra, so‘nggi ikki yil davomida mintaqaviy chegaralar va xavfsizlik sohasida muhim islohotlar amalga oshirildi. “Biz NATOning O‘zbekistonga qiziqishi tobora ortib borayotganiga guvoh bo‘lmoqdamiz”, – degan Latviya elchisi.
Turkiyaning Toshkentdagi elchisi Ahmet Bashar Shen diplomatik vakolatxonaga yuklangan vazifalarni bajarishga, O‘zbekiston va NATO o‘rtasida ma’lumotlar almashishda ko‘prik vazifasini bajarishga tayyorligini bildirgan.
“O‘zbekiston NATO uchun muhim mamlakatlardan biri hisoblanadi. Aynan O‘zbekiston orqali NATO Afg‘onistonga insonparvarlik yordamini yetkazib turadi”, – degan Bashar Shen.
O‘zbekiston 1993-yildan beri NATOning ilmiy tadbirlarida va “Tinchlik uchun hamkorlik” dasturida qatnashmoqda.
Bugungi kunda NATOga 29 ta davlat a’zo, ulardan uchtasi sobiq Sovet ittifoqi respublikalari – Latviya, Litva va Estoniyadir. NATO a’zolarining harbiy xarajatlari butun dunyo harbiy xarajatlarining 70 foizidan ko‘prog‘ini tashkil qiladi.
Izoh (0)