O‘zAda Qashqadaryo viloyatining Qarshi shahridagi muammolarni aks ettiruvchi tanqidiy materiallarga mutasaddi tashkilotlardan jo‘yali javob ololmagani haqida maqola chop etildi. Quyida ushbu maqola e’tiboringizga havola etiladi.
Keyingi yillarda Prezident Shavkat Mirziyoyev tashabbusi bilan mamlakatda aholi turmush darajasini yuksaltirish, odamlarning kelajakda emas, bugun yaxshi yashashi uchun zarur sharoitlar yaratish borasida tub islohotlar amalga oshirilmoqda. Buni hayotning barcha jabhalarida ko‘rish-kuzatish mumkin. Jumladan, ommaviy axborot vositalari faoliyatida ham. Binobarin, matbuot ham davlat rahbari qo‘yayotgan talablarga hamqadam bo‘lishga, fuqarolar hayoti va dunyoqarashida ro‘y berayotgan o‘zgarishlar, joylarda amalga oshirilayotgan bunyodkorlik ishlari, yo‘l qo‘yilayotgan kamchilik va xatolar haqida ro‘y-rost yozishga, avvalgidek bo‘yab-bejab emas, borini bo‘y-basti bilan ko‘rsatishga harakat qilmoqda. Qaysidir darajada bunga muvaffaq bo‘lmoqda ham. Lekin, afsuski, hamma joyda ham aholini qiynayotgan muammolarni hal etish, odamlarning og‘irini yengil qilishga mutasaddi rahbarlar bir xil munosabatda bo‘lyapti, o‘zlari mas’ul bo‘lgan hududga oid matbuotda ko‘tarilgan dolzarb masalalarga yechim topishda jonbozlik ko‘rsatyapti, deb bo‘lmaydi.
O‘zAda so‘nggi bir yilda birgina Qashqadaryo viloyatidan odamlarni qiynayotgan muammolar bo‘yicha bir necha tanqidiy chiqishlar qilindi. Bu bilan o‘rtaga tashlanayotgan muammoga mas’ul rahbarlar e’tiborini tortish, yechim topish, eng muhimi, odamlarning og‘irini yengil qilishga oz bo‘lsa-da, hissa qo‘shishdek ezgu maqsad mujassam edi. Afsus, yanglishgan ekanmiz, hech narsa o‘zgarmabdi. Shu ketishda o‘zgarmasa ham kerak. Shuning uchun mavzuga yana qaytish, Qashqadaryo viloyati va Qarshi shahar hokimliklari mas’ullarini odamlarning dardini eshitish va ularni qiynayotgan muammolarni hal etishda ozgina jonini qiynashga undashni lozim topdik.
“Qarshi shahri ko‘chalaridagi o‘ydim-chuqurlar qachon yamaladi?”. Rosa bir yil avval xuddi shu sarlavha ostida Qarshi shahridagi kun sayin yemirilib, tosh-qumi chiqib borayotgan Nasaf ko‘chasini birov ta’mirlashni xayoliga keltirmayotgani xususida material berilgan edi. Afsuski, u yerda ahvol hamon o‘sha-o‘sha. Hatto, yaxshilanish o‘rniga o‘tgan yilgidagidan-da ayanchliroq ahvolga yuz tutmoqda.
Avtomashinalar mashhur qiziqchi Hojiboy Tojiboyev aytganidek “aylanib” o‘tishga majbur bo‘lmoqda. Ammo, qachongacha?! Ahvol shunday davom etsa, etaversa, “aylanib” o‘tayotgan mashinalar buzilaversa, yo‘lovchi qiynalaversa, buning badalini kim to‘laydi? Qarshi shahriga tumanlardan kirib keluvchi transport vositalarining asosiy qismi shu yo‘ldan qatnaydi. Qarshi shahridagi tun-u kun serqatnov bo‘lgan ushbu ko‘chaning hozirgi ahvoli viloyat markazi, degan sharafli nomga sira mos kelmaydi. Viloyat va shahar mutasaddilari loaqal shuni tushunishsa edi...
“Qarshidagi bozor huvillab yotibdi. Nega?”. Qarshi shahar 2-mitti tumanda joylashgan “Ko‘kcha nur” dehqon bozorining huvillab yotganini ko‘rib, “Muammoni ko‘tarsak, har holda “nimalardir” qilinib, kimlargadir omborxona, kimlargadir narsasini qor-yomg‘irdan asraydigan boshpana, yana birovlarga kim bilsin, qanday maqsadlar uchun ”xufiya“ maskan vazifasini o‘tayotgan bo‘m-bo‘sh bozor ko‘cha boshini tirband qilib, o‘tib-qaytishga xalaqit berayotgan olib-sotarlar bilan to‘lib, gullab-yashnab ketsa”, degan umidda shu sarlavhali maqola e’lon qilgan edik. Ammo chuchvarani xom sanagan ekanmiz. Yozganlarimiz qog‘ozda, so‘zlarimiz havoda qoldi. Bu lavha mutasaddilarga zig‘ircha ham ta’sir ko‘rsatmadi.
Mavjud muammoga ozgina e’tibor qaratilganida katta yo‘l bo‘yiga joylashib olib, noqulay sharoit va sanitariya talablariga zid holda poliz, meva-sabzavot va boshqa mahsulotlar savdosi bilan shug‘ullanuvchi tadbirkorlar nihoyat bir joyga jam bo‘lishi mumkin edi. Bu sotuvchiga ham, xaridorga ham juda qo‘l kelardi.
Afsus, kutilgan natija bo‘lmadi, hamon “Eski hammom, eski tos”. Yana bozorga eltadigan ko‘chada antisanitariya holatida mahsulotini yerga yoyib savdo qilinmoqda. Bozor esa o‘sha-o‘sha “ko‘zlari” sotuvchi-yu xaridorlar yo‘liga intizor turibdi.
“Shudgorga aylangan stadionlar” sarlavhali maqola Qarshi shahar Geolog mahallasidagi sun’iy qoplamali mini-stadionlar haqida edi. Hamon hech qanday yo‘q...
Har kuni ishga shu maydoncha yonidan o‘tib qatnayman. Sun’iy qoplamali maydon abgor holatga kelib qolganini ko‘rib, afsuslanaman. Nima maqsadlarda qurildi-yu, nima maqsadlarga xizmat qilmoqda? Essiz, shuncha mablag‘... Bir paytlar tashlandiq bo‘lgan bu joyda mini-futbol maydonchalari qurilganda, eh-he, tevarak-atrofdagi aholi juda quvongan, ayniqsa, yoshlar o‘zlarini bo‘lajak professional futbolchilar deb his qilgan edi. Buning ustiga har holda shahar ko‘rkiga ko‘rk. Lekin, bu shodliklar uzoq cho‘zilmadi...
Ayniqsa, bugungi kunda sun’iy qoplamali mini-futbol maydonlari yosh-u qarini birdek o‘ziga jalb etmoqda. Birgina Qashqadaryo viloyatida shunday maydonlar soni 100 dan ortadi. Biroq, aksariyat futbol stadionlarining abgor ahvoldaligi kishini o‘ylantiradi.
“Yoshlar markazini obod hududga aylantiraylik...” Bu maqolada Qarshi shahar Yoshlar markazi binosidagi xunuk holat xususida batafsil yozilgan edi. O‘sha maqoladan so‘ng esgan ba’zi bir keskin “shamol”lar markaz binosida bir qator ijobiy o‘zgarishlar bo‘lib ketishiga sha’ma qilgandek edi. Lekin bu shamollar o‘tkinchi ekan. Bahor shamoliday bir pasda tindi-qoldi. Aytilgan gaplar mutasaddilarning ham bir pasda yodidan ko‘tarildi.
Chunki maqola yozilganidan so‘ng qish yakunlanib, bahor, undan keyin yoz ham keldi. Yomg‘ir va qorlar “qishlagani” boshqa o‘lkalarga ketdi. Mana, yana qish eshik qoqib turibdi. Ketma-ket yomg‘ir yog‘ib, sovuq kunlar tushdi. Markaz binosi esa soyabonsiz qolgan yo‘lovchidek shalobbo holda zir-zir titraydi...
Lekin, na iloj. Qancha-qancha bunyodkor g‘oyalar, tashabbuslar, innovatsion loyihalar chiqayotgan yoshlar ittifoqi viloyat kengashidan binoni ta’mirlatish uchun hatto jo‘yali fikr ham o‘zi chiqmayapti. Chiqmasa ham kerak. Yo‘qsa, o‘tgan yilgi maqoladan so‘ng hech bo‘lmasa markazning tom qismini ta’mirlatgan bo‘lar edi...
Hali qish oldinda, yomg‘ir va qorlar oldinda. Umid qilamizki, markaz binosiga ziyon yetmasin, ularning chaqiriq va g‘oyalariga ergashayotgan iqtidorli yoshlar ko‘chada qolmasin...
Aslida tanqidiy maqola tayyorlashdan, uni jamoatchilik e’tiboriga havola etishdan maqsad nima? Mavjud muammoni ijobiy hal qilish, uni yaxshi tomonga o‘zgartirish emasmi? Afsuski, hamma ham bunday o‘ylamas ekan-da! Maqsadimiz xalqimiz hayoti yaxshilanishiga, yoshlarimiz faoliyatiga to‘siq bo‘layotgan ayrim muammo va kamchiliklarning ijobiy hal etilishiga hissa qo‘shish. O‘ylaymizki, mutasaddilar endi harakatga keladi va biz bu mavzuga boshqa qaytmaymiz. Qaytsak ham faqat bularning barchasi o‘z yechimini topgani haqida xursand bo‘lib yozish uchun qaytamiz.
Izoh (0)