ЎзАда Қашқадарё вилоятининг Қарши шаҳридаги муаммоларни акс эттирувчи танқидий материалларга мутасадди ташкилотлардан жўяли жавоб ололмагани ҳақида мақола чоп этилди. Қуйида ушбу мақола эътиборингизга ҳавола этилади.
Кейинги йилларда Президент Шавкат Мирзиёев ташаббуси билан мамлакатда аҳоли турмуш даражасини юксалтириш, одамларнинг келажакда эмас, бугун яхши яшаши учун зарур шароитлар яратиш борасида туб ислоҳотлар амалга оширилмоқда. Буни ҳаётнинг барча жабҳаларида кўриш-кузатиш мумкин. Жумладан, оммавий ахборот воситалари фаолиятида ҳам. Бинобарин, матбуот ҳам давлат раҳбари қўяётган талабларга ҳамқадам бўлишга, фуқаролар ҳаёти ва дунёқарашида рўй бераётган ўзгаришлар, жойларда амалга оширилаётган бунёдкорлик ишлари, йўл қўйилаётган камчилик ва хатолар ҳақида рўй-рост ёзишга, аввалгидек бўяб-бежаб эмас, борини бўй-басти билан кўрсатишга ҳаракат қилмоқда. Қайсидир даражада бунга муваффақ бўлмоқда ҳам. Лекин, афсуски, ҳамма жойда ҳам аҳолини қийнаётган муаммоларни ҳал этиш, одамларнинг оғирини енгил қилишга мутасадди раҳбарлар бир хил муносабатда бўляпти, ўзлари масъул бўлган ҳудудга оид матбуотда кўтарилган долзарб масалаларга ечим топишда жонбозлик кўрсатяпти, деб бўлмайди.
ЎзАда сўнгги бир йилда биргина Қашқадарё вилоятидан одамларни қийнаётган муаммолар бўйича бир неча танқидий чиқишлар қилинди. Бу билан ўртага ташланаётган муаммога масъул раҳбарлар эътиборини тортиш, ечим топиш, энг муҳими, одамларнинг оғирини енгил қилишга оз бўлса-да, ҳисса қўшишдек эзгу мақсад мужассам эди. Афсус, янглишган эканмиз, ҳеч нарса ўзгармабди. Шу кетишда ўзгармаса ҳам керак. Шунинг учун мавзуга яна қайтиш, Қашқадарё вилояти ва Қарши шаҳар ҳокимликлари масъулларини одамларнинг дардини эшитиш ва уларни қийнаётган муаммоларни ҳал этишда озгина жонини қийнашга ундашни лозим топдик.
«Қарши шаҳри кўчаларидаги ўйдим-чуқурлар қачон ямалади?». Роса бир йил аввал худди шу сарлавҳа остида Қарши шаҳридаги кун сайин емирилиб, тош-қуми чиқиб бораётган Насаф кўчасини биров таъмирлашни хаёлига келтирмаётгани хусусида материал берилган эди. Афсуски, у ерда аҳвол ҳамон ўша-ўша. Ҳатто, яхшиланиш ўрнига ўтган йилгидагидан-да аянчлироқ аҳволга юз тутмоқда.
Автомашиналар машҳур қизиқчи Ҳожибой Тожибоев айтганидек «айланиб» ўтишга мажбур бўлмоқда. Аммо, қачонгача?! Аҳвол шундай давом этса, этаверса, «айланиб» ўтаётган машиналар бузилаверса, йўловчи қийналаверса, бунинг бадалини ким тўлайди? Қарши шаҳрига туманлардан кириб келувчи транспорт воситаларининг асосий қисми шу йўлдан қатнайди. Қарши шаҳридаги тун-у кун серқатнов бўлган ушбу кўчанинг ҳозирги аҳволи вилоят маркази, деган шарафли номга сира мос келмайди. Вилоят ва шаҳар мутасаддилари лоақал шуни тушунишса эди...
«Қаршидаги бозор ҳувиллаб ётибди. Нега?». Қарши шаҳар 2-митти туманда жойлашган «Кўкча нур» деҳқон бозорининг ҳувиллаб ётганини кўриб, «Муаммони кўтарсак, ҳар ҳолда «нималардир» қилиниб, кимларгадир омборхона, кимларгадир нарсасини қор-ёмғирдан асрайдиган бошпана, яна бировларга ким билсин, қандай мақсадлар учун »хуфия« маскан вазифасини ўтаётган бўм-бўш бозор кўча бошини тирбанд қилиб, ўтиб-қайтишга халақит бераётган олиб-сотарлар билан тўлиб, гуллаб-яшнаб кетса», деган умидда шу сарлавҳали мақола эълон қилган эдик. Аммо чучварани хом санаган эканмиз. Ёзганларимиз қоғозда, сўзларимиз ҳавода қолди. Бу лавҳа мутасаддиларга зиғирча ҳам таъсир кўрсатмади.
Мавжуд муаммога озгина эътибор қаратилганида катта йўл бўйига жойлашиб олиб, ноқулай шароит ва санитария талабларига зид ҳолда полиз, мева-сабзавот ва бошқа маҳсулотлар савдоси билан шуғулланувчи тадбиркорлар ниҳоят бир жойга жам бўлиши мумкин эди. Бу сотувчига ҳам, харидорга ҳам жуда қўл келарди.
Афсус, кутилган натижа бўлмади, ҳамон «Эски ҳаммом, эски тос». Яна бозорга элтадиган кўчада антисанитария ҳолатида маҳсулотини ерга ёйиб савдо қилинмоқда. Бозор эса ўша-ўша «кўзлари» сотувчи-ю харидорлар йўлига интизор турибди.
«Шудгорга айланган стадионлар» сарлавҳали мақола Қарши шаҳар Геолог маҳалласидаги сунъий қопламали мини-стадионлар ҳақида эди. Ҳамон ҳеч қандай йўқ...
Ҳар куни ишга шу майдонча ёнидан ўтиб қатнайман. Сунъий қопламали майдон абгор ҳолатга келиб қолганини кўриб, афсусланаман. Нима мақсадларда қурилди-ю, нима мақсадларга хизмат қилмоқда? Эссиз, шунча маблағ... Бир пайтлар ташландиқ бўлган бу жойда мини-футбол майдончалари қурилганда, эҳ-ҳе, теварак-атрофдаги аҳоли жуда қувонган, айниқса, ёшлар ўзларини бўлажак профессионал футболчилар деб ҳис қилган эди. Бунинг устига ҳар ҳолда шаҳар кўркига кўрк. Лекин, бу шодликлар узоқ чўзилмади...
Айниқса, бугунги кунда сунъий қопламали мини-футбол майдонлари ёш-у қарини бирдек ўзига жалб этмоқда. Биргина Қашқадарё вилоятида шундай майдонлар сони 100 дан ортади. Бироқ, аксарият футбол стадионларининг абгор аҳволдалиги кишини ўйлантиради.
«Ёшлар марказини обод ҳудудга айлантирайлик...» Бу мақолада Қарши шаҳар Ёшлар маркази биносидаги хунук ҳолат хусусида батафсил ёзилган эди. Ўша мақоладан сўнг эсган баъзи бир кескин «шамол»лар марказ биносида бир қатор ижобий ўзгаришлар бўлиб кетишига шаъма қилгандек эди. Лекин бу шамоллар ўткинчи экан. Баҳор шамолидай бир пасда тинди-қолди. Айтилган гаплар мутасаддиларнинг ҳам бир пасда ёдидан кўтарилди.
Чунки мақола ёзилганидан сўнг қиш якунланиб, баҳор, ундан кейин ёз ҳам келди. Ёмғир ва қорлар «қишлагани» бошқа ўлкаларга кетди. Мана, яна қиш эшик қоқиб турибди. Кетма-кет ёмғир ёғиб, совуқ кунлар тушди. Марказ биноси эса соябонсиз қолган йўловчидек шалоббо ҳолда зир-зир титрайди...
Лекин, на илож. Қанча-қанча бунёдкор ғоялар, ташаббуслар, инновацион лойиҳалар чиқаётган ёшлар иттифоқи вилоят кенгашидан бинони таъмирлатиш учун ҳатто жўяли фикр ҳам ўзи чиқмаяпти. Чиқмаса ҳам керак. Йўқса, ўтган йилги мақоладан сўнг ҳеч бўлмаса марказнинг том қисмини таъмирлатган бўлар эди...
Ҳали қиш олдинда, ёмғир ва қорлар олдинда. Умид қиламизки, марказ биносига зиён етмасин, уларнинг чақириқ ва ғояларига эргашаётган иқтидорли ёшлар кўчада қолмасин...
Аслида танқидий мақола тайёрлашдан, уни жамоатчилик эътиборига ҳавола этишдан мақсад нима? Мавжуд муаммони ижобий ҳал қилиш, уни яхши томонга ўзгартириш эмасми? Афсуски, ҳамма ҳам бундай ўйламас экан-да! Мақсадимиз халқимиз ҳаёти яхшиланишига, ёшларимиз фаолиятига тўсиқ бўлаётган айрим муаммо ва камчиликларнинг ижобий ҳал этилишига ҳисса қўшиш. Ўйлаймизки, мутасаддилар энди ҳаракатга келади ва биз бу мавзуга бошқа қайтмаймиз. Қайтсак ҳам фақат буларнинг барчаси ўз ечимини топгани ҳақида хурсанд бўлиб ёзиш учун қайтамиз.
Изоҳ (0)