O‘zbekistonda Rossiya hududida hamyurtlarini terrorchi tashkilotlar safiga jalb etish bilan shug‘ullanib kelgan buxorolik San’at To‘qsonovga nisbatan hukm chiqarildi. Bu haqda “Podrobno.uz” xabar bermoqda.
U 2009-yili Buxoro shahar sudi tomonidan bezoriligi uchun sudlangan, biroq o‘sha yilning o‘zi amnistiya tufayli jazodan ozod qilingandi. To‘qsonov 2010-yildan boshlab Moskvaga qatnaydi va u yerda yollanma ishchi bo‘lib mehnat qiladi.
Oradan ma’lum vaqt o‘tgach u faoliyatini o‘zgartiradi va hozirda jazoni o‘tayotgan buxorolik Akram Rustamov, Rahmiddin Kamolov va boshqalar bilan birga yashirin jihodchilar oqimi yig‘ilishlarida ishtirok eta boshlaydi. Mehnat muhojirlari, xususan, Moskvaga O‘zbekiston va qo‘shni respublikadan kelgan yoshlar o‘rtasida ekstremizm g‘oyalarini targ‘ib etadi. Musulmonlarga ko‘mak berish uchun Suriyaga borishga da’vat qiladi.
San’at To‘qsonovning noqonuniy harakatlariga chek qo‘yish maqsadida DXX Buxoro viloyat boshqarmasi tomonidan unga nisbatan jinoiy ish qo‘zg‘atildi. Horijlik hamkasblar bilan hamkorlikdagi tadbirlar davomida To‘qsonov Dog‘istonning Xasavyurt shahrida qo‘lga olindi va O‘zbekistonga keltirildi.
U jinoyat ishlari bo‘yicha Buxoro viloyat sudi qarori bilan 5 yilga ozodlikdan mahrum etildi.
Izoh (0)