10—11-dekabr kunlari Toshkentda “O‘zbekiston madaniy merosi jahon to‘plamlarida” loyihasining 2018-yil yakunlari va “Yo‘l xaritasi-2019”ni ishlab chiqishga bag‘ishlangan xalqaro multimedia forumi bo‘lib o‘tadi. Bu haqda “Daryo”ga O‘zEOAVMA matbuot xizmati ma’lum qildi.
“NAESMI Media Hall”da (“Zarafshon” konsert zali) bo‘lib o‘tadigan forum ilmiy va madaniy qismlardan iborat. Unda olimlar o‘z natijalari va shov-shuvli topilmalari haqida so‘zlab beradi. Jumladan, tarix fanlari doktori, sankt-peterburglik Efim Rezvan O‘zbekiston hududiga tegishli dunyoning 114 ta Qur’oni haqida qiziqarli ma’lumotlar bilan o‘rtoqlashadi. Markaziy Osiyo va Kavkaz instituti raisi Frederik Starr kitob nashriyotida kengaytirilgan voqelikni qanday qo‘llash mumkinligi haqida so‘zlab beradi. O‘zbek olimlarining o‘tmishda kichik nashrlarda chop etilgan, natijada keng doiradagi kitobxonlarning foydalanishiga imkoniyat bermagan qimmatli ilmiy asarlarini qayta nashr etish loyihasi taqdim etiladi.
Ushbu turkumning birinchi kitobi – E. Rtveladzening “Buyuk Hind yo‘li”, “O‘zbekistonning 100 mashhur qo‘lyozma yodgorliklari” loyihasi, Sharafaddin Yazdiyning “Zafarnoma” (“G‘alabalar kitobi”) asari faksimilesi taqdimoti forumning muhim qismiga aylanadi. “Rossiya – Kultura” telekanalining O‘zEOAVMA bilan birgalikdagi “O‘zbekiston. Sevgi haqida afsonalar” to‘rt seriyali hujjatli filmi, shuningdek Germaniya kinokompaniyasi tomonidan “O‘zbekistonning buyuk faylasuflari” filmini suratga olish bo‘yicha loyihaning revyusi o‘tkaziladi.
Tadbir doirasida “Zamonaviy dunyodagi madaniy meros: saqlash va ommalashtirish” mavzusidagi ilmiy-amaliy konferensiya hamda Temuriylar tarixi davlat muzeyida “O‘zbekiston madaniy merosi jahon to‘plamlarida” loyihasi doimiy ko‘rgazmasining ochilish marosimi bo‘lib o‘tadi.
Forumning madaniy dasturini O‘zbekistonning tarixiy-madaniy merosini ommalashtirish va turistik salohiyatini oshirishga yo‘naltirilgan “X ijtimoiy media-mahsulotlar milliy festivali” davom ettiradi.
Shuningdek, tadbirlar doirasida joriy yilda nashrga tayyorlangan 10 ta albom taqdimoti rejalashtirilgan.
Bundan tashqari, interaktiv hududda O‘zbekistonda birinchi marta ilmiy-madaniy sohada 3D texnologiyasi taqdimoti bo‘lib o‘tadi.
Ikki kun davom etadigan forum natijalari bo‘yicha O‘zbekistonning madaniy merosini o‘rganish, saqlash va ommalashtirish bo‘yicha Butunjahon jamiyati faoliyatining 2019-yil uchun yo‘l xaritasi ishlab chiqiladi.
Tadbir tashkilotchilari – O‘zbekiston elektron ommaviy axborot vositalari milliy assotsiatsiyasi (O‘zEOAVMA), Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondining mablag‘larini boshqarish bo‘yicha parlament komissiyasi, Turizmni rivojlantirish qo‘mitasi, O‘zbekiston yoshlar ittifoqi, Fanlar akademiyasi, O‘zbekistonga oid xorijdagi madaniy boyliklarni tadqiq etish markazi, Vazirlar Mahkamasi huzuridagi Islom sivilizatsiyasi markazi, O‘zbekiston Respublikasi Madaniyat vazirligi va YuNЕSKOning O‘zbekistondagi vakolatxonasi.
Izoh (0)