Nukus shahrida O‘zbekiston Konstitutsiyasi qabul qilinganining 26 yilligi munosabati bilan “O‘zbekiston yoshlari — yangi zamon bunyodkorlari!” shiori ostida yoshlar festivali boshlandi. Bu haqda O‘zA xabar berdi.
Festivalni o‘tkazishdan ko‘zlangan asosiy maqsad yoshlarning ijtimoiy faolligini oshirish, ularda mamlakatda ro‘y berayotgan yangilik va o‘zgarishlarga daxldorlik tuyg‘usini yuksaltirish va navqiron avlodni turli yot g‘oyalar ta’siridan himoya qilishga qaratilgan.
Festival doirasida “Yoshlar kutubxonasi”, “Bolalar kitobi”, “Yoshlar nashrlari kunlari”, “Kelajak bunyodkorlari”, “Tabiat tarafdorlari” va “Yuqori malakali bepul tibbiy xizmat” loyihalari hamda “Mustahkam oila siri” yosh oilalar forumi tashkil etiladi.
Kasb-hunar kollejlari o‘quvchilari o‘rtasida futbol bo‘yicha “Yoshlar ittifoqi kubogi”, uyushmagan yoshlar o‘rtasida shaxmat bo‘yicha “Yoshlar shaxmat taxtasi”, boks bo‘yicha “Alpomish izdoshlari” musobaqalari o‘tkaziladi.
Shuningdek, “Konstitutsiya haftaligi”, “Yoshlar bilan ochiq muloqot” loyihalari doirasida “Hokim va yoshlar”, “Sud va yoshlar”, “Deputat va yoshlar”, “Prokuror va yoshlar” uchrashuvlari, “Mening dalam — mening faxrim” shiori ostida yosh fermerlar tomonidan yetishtirilgan mahsulotlar ko‘rgazmasi va “Biznes sayohat” loyihalari tashkil etilishi rejalashtirilgan.
Turli mavzulardagi davra suhbati va ochiq muloqotlardan tashqari chekka qishloqlardagi ta’lim muassasalari, mahallalar, harbiy qismlar va kasalxonalarga kitoblar sovg‘a qilish, kam ta’minlangan, ijtimoiy himoyaga muhtoj oila farzandlari holidan xabar olish, tajribali shifokorlarni jalb qilgan holda bepul tibbiy ko‘riklar ham tashkil etiladi.
Festival joriy yilning 2-dekabr sanasiga qadar barcha shahar va tumanlarda, olis qishloqlarda davom etadi.
Izoh (0)