Kelgusi yilning birinchi yarmida Koreya Respublikasi Prezidenti Mun Chje Inning O‘zbekistonga tashrifi kutilmoqda. Oliy darajadagi sammitga tayyorgarlik ko‘rish doirasida 30-noyabr kuni “O‘zbekiston – Koreya: kelajakka nazar” mavzusida seminar bo‘lib o‘tdi. Bu haqda O‘zA xabar berdi.
O‘zbekiston Respublikasi Prezidenti huzuridagi Davlat boshqaruvi akademiyasida tashkil etilgan tadbirda ikki mamlakatning tegishli vazirlik va idoralari, ilmiy-tadqiqot, tahlil markazlari vakillari ishtirok etdi. Unda savdo-iqtisodiy, investitsiya, transport-kommunikatsiya kabi sohalarda hamkorlik istiqbollari muhokama qilindi.
Anjumanning ochilishida O‘zbekiston Respublikasi Prezidenti huzuridagi Strategik va mintaqalararo tadqiqotlar instituti direktori Vladimir Norov, O‘zbekiston Respublikasi Prezidenti davlat maslahatchisi, Davlat boshqaruvi akademiyasi rektori Rustam Qosimov, Koreya Respublikasining O‘zbekistondagi Favqulodda va muxtor elchisi Kvon Yon U, Xanyan universitetining Osiyo-Tinch okeani tadqiqotlar markazi direktori Gu Xo Yom, Koreya milliy diplomatiya akademiyasining tashqi ishlar va milliy xavfsizlik instituti direktori Kim In Chul so‘zga chiqdi.
– O‘zbekiston va Koreya o‘rtasidagi o‘zaro ishonch va samimiylik ruhidagi hamkorlik barcha sohalar qatori mamlakatimizning iqtisodiy taraqqiyotiga ham munosib hissa bo‘lib qo‘shilmoqda, – dedi V.Norov. – Bugungi kunda Koreya tomonidan mamlakatimizga kiritilgan investitsiya 7 milliard AQSh dollaridan ortiqni tashkil qilmoqda. Mamlakatimizda hamkor tomon sarmoyasi ishtirokida ko‘plab korxonalar neft-gaz, kimyo, mashinasozlik, axborot-kommunikatsiya texnologiyalari, transport, logistika, turizm kabi sohalarda samarali faoliyat yuritmoqda.
Prezident Shavkat Mirziyoyevning 2017-yilda Janubiy Koreyaga davlat tashrifi chog‘ida bo‘lib o‘tgan oliy darajadagi muzokaralar natijasida savdo-iqtisodiy, investitsiya, moliya kabi qator yo‘nalishlarda 60 dan ziyod bitim va shartnomalar imzolangandi. Ularning jami qiymati 10 milliard AQSh dollaridan ziyod. Shundan 4,5 milliard AQSh dollari to‘g‘ridan-to‘g‘ri investitsiya ulushiga to‘g‘ri keladi. Shu kunlarda Koreyaning Evergreen Motors va Posco-Daewoo corporation kompaniyalari tomonidan Namanganda “Hyundai-Namangan KD” zavodini qurish ishlari boshlab yuborilganini o‘zaro kelishuvlarning ijobiy samaralari sifatida baholash mumkin.
Seminarning birinchi yalpi sessiyasi O‘zbekiston – Koreya siyosiy sohadagi hamkorligini yanada rivojlantirish mavzusiga bag‘ishlandi.
Sessiyada ikki davlat o‘rtasidagi hamkorlik tarixi, joriy holati va istiqbollari tahlil qilindi.
Koreya milliy diplomatiya akademiyasi departamenti Bosh direktori Ko Ja Namning ta’kidlashicha, ikki tomonlama munosabatlarni yanada rivojlantirishda savdo-iqtisodiy, parlamentlararo hamkorlik yo‘nalishlarida amaliy hamkorlikni yangi bosqichga olib chiqish lozim.
Navbatdagi sessiya iqtisodiy aloqalar, transport-logistika, energetika, innovatsiya, fan-ta’lim, madaniyat, gumanitar sohalar bo‘yicha hamkorlik masalalari muhokamasiga bag‘ishlandi.
Anjuman so‘nggida ishtirokchilar O‘zbekiston – Koreya o‘rtasida keng ko‘lamli munosabatlarni yanada rivojlantirish, hamkorlikning yangi qirralarini ochishga yo‘naltirilgan ekspert kuzatuvlarini davom ettirishga kelishib oldi.
Izoh (0)