2018-yilning 28-noyabr kuni Ottava shahrida O‘zbekiston—Kanada vazirlar siyosiy maslahatlashuvlarining sakkizinchi raundi bo‘lib o‘tdi. Bu haqda Tashqi ishlar vazirligi matbuot xizmati xabar berdi.
O‘zbekiston Respublikasi Tashqi ishlar vazirining o‘rinbosari Dilshod Axatov va Kanada Tashqi ishlar, savdo va taraqqiyot vazirligining Qutb oldi mintaqasi, Sharqiy Yevropa va Yevrosiyo masalalari bo‘yicha Byuro bosh direktori Alison Le Klair ikki tomonlama va mintaqaviy kun tartibining dolzarb masalalari yuzasidan batafsil muzokaralar o‘tkazdi.Unda 2017-yilning oktabr oyida Toshkent shahrida bo‘lib o‘tgan tashqi siyosiy maslahatlashuvlarning oldingi raundi doirasida erishilgan kelishuvlarni amalga oshirish jarayoni yuzasidan fikr almashildi.Muzokaralarda savdo-iqtisodiy aloqalarni kengaytirish, tovarlar va xizmatlarning o‘zaro yetkazib berilishini rag‘batlantirish, investitsiya uchun zarur shart-sharoitlarni yaratish hamda turistlar oqimini oshirish uchun choralar qabul qilishga tomonlarning tayyorligi qayd etildi.Delegatsiya 27-noyabr kuni Nyu-York shahrida BMT shafeligida ish boshlagan, Orolbo‘yi mintaqasi uchun inson xavfsizligi bo‘yicha ko‘p tomonlama trast fondi doirasida hamkorlikni yo‘lga qo‘yish yuzasidan kelishib oldi.Shu kunning o‘zida O‘zbekiston delegatsiyasi Kanada tashqi ishlar vaziri o‘rinbosari Ian Shugart bilan muzokara o‘tkazdi.
Suhbat chog‘ida vazirliklararo siyosiy maslahatlashuvlar natijalari sarhisob qilindi va ustuvor yo‘nalishlardagi hamkorlikni yanada rivojlantirish istiqbollari ko‘rib chiqildi.Ottava shahriga tashrif doirasida O‘zbekiston delegatsiyasi Kanada Parlamentida bo‘ldi va Jamoalar palatasi a’zosi Ziyad Abo ul-Taif boshchiligidagi “Kanada-O‘zbekiston” do‘stlik guruhi a’zolari bilan uchrashdi. Kanada tashqi ishlar vazirining parlamentdagi kotibi Andre Lesli bilan alohida uchrashuv bo‘lib o‘tdi. Suhbat chog‘ida O‘zbekiston-Kanada munosabatlarining ustuvor yo‘nalishlari muhokama qilindi.26—27-noyabr kunlari Monreal va Ottava shaharlarida Kanada Eksportni rivojlantirish korporatsiyasi, Kanada Savdoni rivojlantirish korporatsiyasi vakillari hamda O‘zbekistonda biznes yuritishga qiziqish bildirgan mamlakatning qator yetakchi kompaniyalari rahbarlari bilan uchrashuv o‘tkazildi.O‘zbekiston delegatsiyasi Kanadaning Yevrosiyo va Rossiyadagi ishbilarmon assotsiatsiyasida (CERBA) bo‘lib, yetakchi ishlab chiqarish va moliya tuzilmalari uchun O‘zbekistonning investitsion salohiyati taqdimotini o‘tkazdi.
Izoh (0)